शिवसेनाप्रमुखांच्या स्मृती दिनासाठी मनपाची 50 लाखांची तरतूद
मुंबई । शिवसेनाप्रमुख बाळासाहेब ठाकरे यांच्या पाचव्या स्मृतीदिनी 17 नोव्हेंबरला स्मृतीस्थळावर येणार्‍यांना यावर्षी पालिकेच्या वतीने सोयीसुविधा दिल्या जाणार आहेत. सभागृह नेते यशवंत जाधव यांनी केलेल्या मागणीनंतर त्याकरिता पालिकेने 50 लाखांची तरतूद केली आहे. पुढील वर्षापासून नियमितपणे अर्थसंकल्पातच तरतूद केली जाणार आहे. महापौर विश्‍वनाथ महाडेश्‍वर यांनी आज यासंदर्भात पालिका प्रशासन आणि पोलीस व अग्निशामक दलाच्या अधिकार्‍यांची बैठक बोलावली होती. त्यात हा निर्णय घेण्यात आला.
महापौरांच्या बैठकीत सर्वपक्षीय गटनेत्यांच्या उपस्थितीत झाला निर्णय
येत्या 17 नोव्हेंबरला शिवसेनाप्रमुखांचा पाचवा स्मृतीदिन असून यादिवशी देशभरातून शिवसैनिक, सर्वसामान्य नागरिक, विविध क्षेत्रांतील नामवंत व्यक्ती स्मृती स्थळावर येत असतात आणि रांगा लावून स्मृतीस्थळाचे दर्शन घेतात. स्मृतीदिनी येणार्‍या नागरिकांच्या सोयीसाठी यावर्षीपासून पालिकेतर्फे विविध सोयीसुविधा दिल्या जाणार आहेत. महापौर विश्‍वनाथ महाडेश्‍वर यांनी आज बोलावलेल्या बैठकीस पालिका आयुक्त अजोय मेहता, सभागृह नेते यशवंत जाधव, उपमहापौर हेमांगी वरळीकर, स्थायी समिती अध्यक्ष रमेश कोरगावकर, शिक्षण समिती अध्यक्षा शुभदा गुडेकर, सुधार समिती अध्यक्ष अनंत नर, बेस्ट समिती अध्यक्ष अनिल कोकीळ यांच्यासह अग्निशामक दलाचे प्रमुख प्रभात रहांदळे, पोलिस सह आयुक्त (कायदा आणि सुव्यवस्था), पोलिस सहआयुक्त (वाहतूक) उपस्थित होते. तसेच घनकचरा, आरोग्य, अशा विविध संबंधित विभागांचे उपायुक्त उपस्थित होते. स्मृती दिनानिमित्त शिवाजी पार्कवर येणार्‍यांची संख्या वर्षानुवर्षे वाढतच असल्याने पालिकेने विविध सेवासुविधा पुरवाव्या, अशी मागणी या बैठकीत सभागृह नेते यशवंत जाधव यांनी केली. या तयारीसाठी पालिकेतर्फे यावर्षी 50 लाख रुपये खर्च केले जाणार आहेत, तर पुढील वर्षापासून अर्थसंकल्पातच तरतूद केली जाईल
या सुविधा देणार
दोन हजार चौ. मीटरचा विसावा मंडप, आरोग्य केंद्र, पिण्याच्या पाण्याची सोय, व्हीआयपींसाठी मंडप, रांगेत राहणार्‍यांसाठी शेड, अग्निशामक दलाची यंत्रणा, रुग्णवाहिका, मैदानाची साफसफाई, गार्डनिंग, लॅन्डस्केपिंग याचीही जबाबदारी पालिका घेणार आहे, असे आश्‍वासन पालिका आयुक्त अजोय मेहता यांनी दिल्याची माहिती सभागृह नेत्यांनी दिली.