शिवसेनेची विद्यार्थ्यांना ‘टॅब’ देण्याची मोहीम बारगळली

मुंबई । मागील तीन वर्षांपूर्वी गाजावाजा करत मुंबई महानगरपालिका शाळांतील विद्यार्थ्यांना टॅब वितरण करण्यात आले. मात्र, यंदा ही प्रक्रिया लांबली असल्याने पालकांमध्ये संतापाची प्रतिक्रिया आहे. अजून ही टॅबची खरेदी प्रशासनाने केली नसल्याने मुलापर्यंत टॅब पोहोचेपर्यंत दोन महिन्यांचा कालावधी लागणार आहे. त्यामुळे दप्तराचे ओझे कमी करण्याच्या उद्देशाने शिवसेनेच्या संकल्पनेतील ही योजना फोल ठरली आहे. पालिका शाळांतील विद्यार्थ्यांच्या दप्तराचे ओझे कमी करण्याच्या उद्देशाने टॅब योजना सुरू करण्यात आली. योजना सुरू झाल्यानंतर टॅब घोटाळ्याचे आरोप-प्रत्यारोप गाजले. त्यामुळे योजनेच्या प्रारंभीच प्रश्‍नचिन्ह निर्माण झाले होते. पालिका शाळांत शिकणारी बहुतांशी मुले मोलमजुरी करणार्‍या पालकांची असल्याने टॅब योजना मुलांना प्रेरित करणारी ठरली. आरोप-प्रत्यारोपात ही टॅब योजना व्यवस्थितरीत्या राबवली.

शैक्षणिक वर्ष संपत आले तरी टॅब उपलब्ध नाहीत
कोट्यवधी रुपयांची पालिका अर्थसंकल्पात तरतूद केली आहे. मात्र, पालिका प्रशासनाच्या हलगर्जीपणात टॅब खरेदीची प्रक्रिया लांबली आहे. या टॅबमध्ये येत्या आठवी आणि नववीचा पूर्ण अभ्यासक्रम असल्याने मागील चार महिन्यात टॅब उपलब्ध नसल्याने मुलांना पुन्हा दप्तराचे ओझे पेलावे लागत आहे. शैक्षणिक वर्ष संपत आले असताना टॅब का उपलब्ध झाले नाहीत, असा सवाल पालकांकडून विचारला जात आहे. या वर्षअखेरपर्यंत तरी मुलांच्या हातात टॅब मिळावेत, यासाठी प्रशासनाची धावपळ उडाली आहे. 13 हजार टॅब खरेदी करण्याच्या निविदा प्रक्रियेला सुरुवात झाली आहे. 9 वीच्या अभ्यासक्रमात बदल झाल्याने 9 वीतील मुलांचे जुने टॅब 8 वीच्या विद्यार्थ्यांना देण्यात आले.