शिवस्मारकाची 210 मीटरपर्यंत उंची वाढवण्याचा प्रस्ताव

मुंबई : जगात सर्वात उंच स्मारकांमध्ये चीनच्या गौतम बुद्धांच्या पुतळ्याची वर्णी लागते. त्यापेक्षाही मोठे स्मारक भारतात छत्रपती शिवाजी महाराजांचे व्हावे, अशी राज्यसरकारची इच्छा आहे. त्यामुळेच शिवस्मारकाची उंची 192 मीटरऐवजी 210 मीटर करावी, असा प्रस्ताव राज्य सरकारकडून केंद्रीय पर्यावरण विभागाला पाठवण्यात येणार आहे. या प्रस्तावाला मंजुरी मिळाल्यास शिवस्मारक सर्वात उंच ठरणार आहे. चीनच्या ‘लुशान कौंटीमधील स्प्रिंग टेम्पल बुद्धा’ हा जगातील सर्वाधिक उंचीचा पुतळा आहे. डोंगरावर असलेला हा पुतळा 2008 मध्ये पूर्ण झाला. याची मूळ उंची 153 मीटर होती. पण ज्या डोंगरावर हा पुतळा बांधण्यात आला आहे, त्याला पुन्हा आकार देऊन चौथरा बनवला. त्यामुळे पुतळ्याची उंची 208 मीटर झाली.

राज्यसरकारने 3600 कोटी रुपयांची तरतूद
आम्हाला शिवस्मारक उंच हवे आहे. याची निविदा निघाल्यानंतर स्मारकाच्या 210 मीटर उंचीचा प्रस्ताव पर्यावरण मंत्रालयाच्या मंजुरीसाठी पाठवला जाईल, असे शिवस्मारक समितीचे चेअरमन विनायक मेटे यांनी सांगितले. शिवाजी महाराज हे महाराष्ट्राचे आराध्य दैवत आहे. शिवाय आमच्यासाठी आणि पुढील पिढीसाठी प्रेरणास्थान आहेत. स्मारक बनवण्यासाठी शक्य आहे ते सगळे करू, असेही मेटे यांनी सांगितले. शिवस्मारक हा महापालिका निवडणुकीत अनेक पक्षांच्या जाहीरनाम्यातील महत्त्वाचा होता. राज्य सरकारने यासाठी 3600 कोटी रुपयांची तरतूद केली आहे. त्यापैकी 2500 कोटी पहिल्या टप्प्यातील निविदांसाठी राखीव ठेवले आहेत. या स्मारकामध्ये मंदिर, संग्रहालय, रुग्णालय, रायगड किल्ल्याच्या प्रवेशद्वाराची प्रतिकृती आणि शिवाजी महाराजांचे जीवनपट उलगडण्यासाठी थिएटर असेल. आणखी एक वैशिष्ट्य म्हणजे यामध्ये पर्यटकांना शिवस्मारक पाहता यावे, यासाठी 180 मीटर उंचीवर जाणारी लिफ्ट असेल.

वर्षाअखेरीस प्रकल्पाचे काम सुरू होणार
स्मारकाच्या पहिल्या टप्प्यातील 2500 कोटी रुपयांपैकी 1200 कोटी रुपये हे शिवाजी महाराजांच्या ब्रॉन्झच्या पुतळ्यासाठी असतील. मात्र प्रकल्पाच्या दुसर्‍या टप्प्याचा प्लॅन अजून निश्‍चित झालेला नाही. या टप्प्यात हेलिपॅड आणि आयमॅक्स थिएटर यांसारख्या सुविधा असाव्यात, असा प्रस्ताव आहे. या वर्षअखेरीस प्रकल्पाचं काम सुरू होणार असून, काम पूर्ण होण्यासाठी 36 महिन्यांची मुदत देण्यात आली आहे. शिवाजी महाराजांचा अश्‍वारूढ पुतळा प्रसिद्ध शिल्पकार राम सुतार बनवणार आहेत.