शेतकऱ्यांच्या थकित कर्जमाफीचे निकष निश्चित करण्यासाठी सोमवारी बैठक

मुंबई – शेतकऱ्यांच्या विविध प्रश्नांवर चर्चा करण्यासह शेतकऱ्यांच्या थकित कर्जमाफीसंदर्भात निकष ठरविण्यासाठी ‘थकित कर्जमाफी निकष निर्धारण समिती’ची विविध शेतकरी संघटनांचे प्रतिनिधी तसेच शेतकरी प्रतिनिधींसमवेत येत्या सोमवारी म्हणजेच १९ जूनला दुपारी चार वाजता सह्याद्री अतिथीगृहात बैठक आयोजित करण्यात आली आहे.

महसूलमंत्री चंद्रकांत पाटील यांच्या अध्यक्षतेखालील मंत्रीमंडळ उच्चाधिकार समितीची ११ जूनला शेतकरी संघटनांच्या सुकाणू समितीतील प्रतिनिधींसोबत बैठक झाली होती. या बैठकीत ठरल्याप्रमाणे महसूलमंत्री पाटील यांच्या अध्यक्षतेखाली ‘थकित कर्जमाफी निकष निर्धारण समिती’ स्थापन करण्यात आली आहे. सोमवारी होणाऱ्या बैठकीस चर्चेसाठी शेतकरी संघटनांचे प्रतिनिधी खासदार राजू शेट्टी, आमदार जयंत पाटील, आमदार बच्चू कडू, रघुनाथ दादा पाटील, महाराष्ट्र राज्य वस्त्रोद्योग महामंडळाचे अध्यक्ष रविकांत तुपकर, शेतकरी संघटनांची सुकाणू समितीचे संयोजक डॉ. अजित नवले, बँक कर्मचारी प्रतिनिधी विश्वास उटगी, शेतकरी प्रतिनिधी सर्वश्री धनंजय जाधव (पुणतांबे), संजय पाटील, बळीराम सोळंके (माजलगांव) यांना निमंत्रित केले आहे, असे शासनाने स्पष्ट केले आहे.