शेरेबाजीऐवजी सुळे यांनी कामे दाखवावीत

जलसंपदामंत्री विजय शिवतारे यांचा टोला; पाझर तलावाचे भूमिपूजन

सासवड : मागील चार वर्षांत पुरंदर तालुक्याने विकास प्रक्रियेत चांगली कामगिरी केलेली आहे. तालुक्याचा चेहरामोहरा हळूहळू बदलू लागला आहे. बारामती घडायला 50 वर्षं पवार कुटुंबाला राजकारण करावे लागले. पुरंदर-हवेली मतदारसंघ अवघ्या नऊ वर्षांत त्या दिशेने आगेकूच करताना पाहून काँग्रेस-राष्ट्रवादीच्या नेत्यांना आपल्या भवितव्याच्या चिंतेने घेरले आहे. कामाच्या मुद्द्याला बगल देऊन वैयक्तिक शेरेबाजी करण्याऐवजी सुप्रिया सुळे यांनी कामे दाखवावित असा खोचक टोला जलसंपदा राज्यमंत्री विजय शिवतारे यांनी लगावला.

राष्ट्रीय महामार्ग, ग्रामसडक योजनेतून होत असलेला ग्रामीण रस्त्यांचा कायापालट, जलसंधारणातील विक्रमी यश, जेजुरीतील ग्रामीण रुग्णालय, आरटीओ सुविधा, सिमेंट बंधार्‍यांचे जाळे, पुरंदर उपसा आणि जनाईचे अवघ्या 19 टक्के शुल्कात मिळणारे पाणी या व अशा अनेक कामांमुळे पुरंदर तालुक्यातील काँग्रेस-राष्ट्रवादी सैरभैर झालेली आहे. विमानतळाच्या मुद्द्यावर दोनही पक्षांना अजुन निश्‍चित भूमिका ठरवता आलेली नाही. तेच आता तालुक्याच्या विकासाच्या गप्पा मारत आहेत. त्यांना खासदार सुळे यांची कामे दाखवा म्हटल्यावर राग येतो. यांच्या कामावर सेल्फी काढावेत आणि जनतेला दाखवावेत असेही शिवतारे म्हणाले.

रावडेवाडी (गराडे) येथील पाझर तलाव भूमिपूजनप्रसंगी ते बोलत होते. सभापती अर्चना जाधव, अतुल म्हस्के, दादा घाटे, उपसभापती दत्तात्रय काळे, दिलीप यादव, शालिनीताई पवार, ज्योती झेंडे, रमेश जाधव, नलिनी लोळे, शाखाप्रमुख भास्कर जाधव उपस्थित होते. यावेळी बाळासाहेब रावडे, विशाल रावडे, सागर रावडे, शांताराम रावडे, संजय रावडे, पांडुरंग जगदाळे, प्रमोद फडतरे, भाऊसाहेब रावडे, म्हस्कु रावडे, रामदास रावडे यांनी पक्षात प्रवेश केला.