श्रद्धास्थानांचे विडंबन रोखण्यासाठी कठोर कायदा करा

नागपूर – घटनेने दिलेल्या स्वातंत्र्याचा अतिरेक करून हिंदूंच्या देवी-देवता, संत, राष्ट्रपुरुष, धर्मग्रंथ आणि श्रद्धास्थाने यांची फेसबुक, व्हॉट्सअ‍ॅप, यू-ट्यूब, जाहिराती, चित्रपट, नाटक, चित्रप्रदर्शन, संकेतस्थळे यांच्या माध्यमांतून मोठ्या प्रमाणावर विटंबना केली जात आहे. त्यातून लोकांच्या धार्मिक भावना दुखावल्या जाऊन कायदा व सुव्यवस्थेचा प्रश्‍न समाजात निर्माण होत आहे. त्यातून पुढे दंगली, हिंसाचार आणि खून होण्यापर्यंत वातावरण दूषित होत आहे. त्यामुळे देवीदेवता व श्रद्धास्थानांचे विडंबन रोखण्यासाठी शासनाने कठोर आणि सक्षम कायदा राज्यात लागू करावा, अशी मागणी शिवसेनेचे आमदार भरतशेठ गोगावले, रूपेश म्हात्रे आणि अशोक पाटील यांनी मुख्यमंत्री देवेंद्र फडणवीस यांची विधानभवन येथे भेट घेऊन केली. हा कायदा तातडीने लागू न केल्यास शिवसेनेच्या वतीने राज्यव्यापी आंदोलन छेडले जाईल, असा इशाराही शिवसेनेच्या आमदारांनी या वेळी शासनाला दिला.

या वेळी विविध माध्यमांतून होणारी श्रद्धास्थानांची विटंबना दर्शवणारी छायाचित्रे, पुरावे आमदारांच्या वतीने मुख्यमंत्र्यांना देण्यात आले. या वेळी शिवसेनेचे आमदार भरतशेठ गोगावले, अजय चौधरी, सुनील राऊत, बालाजी किणीकर, ज्ञानराज चौगुले, सदानंद चव्हाण, सुरेश गोरे, शशिकांत खेडेकर, रूपेश म्हात्रे, मनोहरशेठ भोईर, राजेश क्षीरसागर यांनी पत्रांद्वारे कठारे कायदा करण्याची मागणी मुख्यमंत्र्याकडे केली.

या वेळी शिवसेनेचे आमदार भरतशेठ गोगावले म्हणाले की, मागे फेसबुकवर  शिवसेनाप्रमुख बाळासाहेब ठाकरे, छत्रपती शिवाजी महाराज, भगवान श्रीराम, श्री हनुमान यांची अश्‍लील व आक्षेपार्ह चित्र प्रसारीत करून तणाव निर्माण करण्यात आला होता. त्यातून पुणे येथे दंगली घडली होती. सदर विटंबनेचे प्रकार रोखण्यासाठी भा.दं.वि. २९५ आणि २९५-अ ही कलमे सक्षम नाहीत. त्यामुळे आरोपींवर कठोर कारवाई करण्यास अडचण निर्माण होते. तरी शासनाने येत्या तीन महिन्यात कठोर आणि सक्षम कायदा करावा. तसेच हा कायदा होईपर्यंत दोषींवर कारवाईसाठी राज्यस्तरावर पोलीस यंत्रणेला मागदर्शक सूचना परिपत्रकाच्या माध्यमातून निगर्मित करण्यात याव्यात, असे गोगावले म्हणाले.