श्री संत मुक्ताई पालखीचे सोमवारी पंढरपूरकडे प्रस्थान

1

निर्मल वारी हरित वारी अभियान आरंभ होणार

मुक्ताईनगर- सुमारे 309 वर्षांची अखंर परंपरा असलेल्या आषाढी वारीसाठी श्री संत मुक्ताबाई पालखीचे सोमवार, 18 जून रोजी श्री क्षेत्र कोथळी, मुक्ताईनगर येथून सकाळी 10 वाजता प्रस्थान ठेवणार आहे. संत मुक्ताबाई पालखी सोहळा सर्वात जास्त अंतराचा प्रवास असल्याने सर्वात आधी प्रस्थान करतो मात्र यंदा अधिकमासामुळे उशिराने प्रस्थान होत आहे. संस्थानकडून पूर्व तयारी करण्यात आली असून राज्यभरातील वारकरी मुक्ताईनगर दाखल होत आहेत.

आषाढी वारीत ‘निर्मल वारी संकल्पना’
यंदाच्या वर्षापासून श्री विठ्ठल रुक्मिणी मंदिरे समितीच्या वतीने आषाढी वारीमध्ये निर्मल वारी हरीत वारीही संकल्पना राबविण्यात येणार आहे. त्यात महाराष्ट्रातील श्री संत ज्ञानेश्वर महाराज, श्री संत तुकाराम महाराज, श्री संत सोपानदेव महाराज, श्री संत निवृत्तीनाथ महाराज, श्री संत एकनाथ महाराज व मुक्ताईनगर येथील श्री संत मुक्ताबाई या मानाच्या प्रमुख पालखी सोहळ्यातील दिंड्याना ‘निर्मल वारी, हरित वारी’ अभियानांतर्गत पुरस्कार देण्यात येणार आहे. शासकीय निवड समिती सदस्य शिवाजीराव मोरे, प्रकाश बुवा जवंजाळ, माधवी निगडे, सुर्यकांत भिसे हे अभियानांचा शुभारंभ मुक्ताईनगरातून करणार आहेत.

मुख्यमंत्र्यांच्या हस्ते रोख पुरस्कार देऊन होणार गौरव
अध्यात्मिक व सांस्कृतिक परंपरा लाभलेले पालखी सोहळे दिवसेंदिवस मोठे होत असून तरुणांचा सहभाग वाढत आहे. असे सोहळे अधिक स्वच्छ, निरोगी, निरामय राखणे त्याचे पावित्र्य राखणे, प्लास्टिकमुक्ती, वृक्षसंवर्ध व स्त्री भ्रृणहत्या या संवेदनशील विषयावर काम करणारे दिंड्याना मुख्यमंत्र्यांचे हस्ते पंढरपूर येथे रोख पुरस्कार देवून गौरवण्यात येईल.

सोमवारी मुक्ताई पालखीचे प्रस्थान
सोमवार, 18 रोजी प्रस्थान सोहळ्यापूर्वी सकाळी सात वाजता हभप.किशोर महाराज , तळवेलकर यांचे काल्याचे कीर्तन होईल. सकाळी नऊ वाजता निर्मल वारी हरित वारी अभियानांतर्गत शुभारंभ कार्यक्रम होईल. सकाळी 10 वाजता पादूका पूजन, भजन, आरती होवून सोहळा प्रस्थान होईल. प्रस्थान सोहळ्यास भाविकांनी उपस्थित राहण्याचे आवाहन संस्थान अध्यक्ष भैय्यासाहेब रवींद्र पाटील सोहळा प्रमुख रवींद्र महाराज हरणे यांनी केले, असे उद्धव जुनारे यांनी कळविले आहे.