संभाजी भिडेंना तडीपार करा

भीम आर्मी संघटनेची मागणी

पुणे : कोरेगाव-भीमा येथे यंदाही 1 जानेवारीला राज्यातील अनेक भागातील नागरिक लाखोंच्या संख्येने अभिवादन करण्यास येणार आहेत. गतवर्षीची घटना लक्षात घेता 25 डिसेंबर ते 5 जानेवारीपर्यंत संभाजी भिडे आणि मिलिंद एकबोटे यांना पाच जिल्ह्यातून तडीपार करावे आणि त्यांना नजरकैदेत ठेवण्यात यावे अशी मागणी भीम आर्मी संघटनेचे पुणे शहर अध्यक्ष दत्ता पोळ यांनी पत्रकार परिषदेत ही मागणी केली.

गतवर्षी भीमा कोरेगाव येथे 1 जानेवारी दरम्यान घडलेल्या दंगलीप्रकरणी मिलिंद एकबोटे, संभाजी भिडे यांच्यावर सरकार कोणत्याही प्रकारची कारवाई करताना दिसत नाही असा आरोप दत्ता पोळ यांनी यावेळी केला.

पोळ म्हणाले, पुण्यात 30 डिसेंबरला दुपारी तीन वाजता भीमा कोरेगाव संघर्ष महासभेला भीम आर्मी संघटनेचे चंद्रशेखर आझाद ऊर्फ रावण यांची सभा होणार असून या सभेला परवानगी देण्यावरून अनेक अडचणी निर्माण झाल्या आहेत. मात्र मागील वर्षभरात भिडेंना पोलीस आणि प्रशासन राज्यात अनेक ठिकाणी कार्यक्रम किंवा सभा घेण्यास परवानगी देत आहे, असा दुजाभाव होता कामा नये. आम्ही कोणत्याही परिस्थितीत रावण यांची सभा घेणार असून त्या संदर्भात काही अडचणी निर्माण झाल्यास न्यायालयात दाद देखील मागितली जाईल अशी भूमिका त्यांनी मांडली.