समता नगरात तरुणाची आत्महत्या

जळगाव : समता नगरातील 38 वर्षीय तरुणाने गळफास घेत आत्महत्या केली. ही घटना रविवारी सकाळी उघडकीला आली. या प्रकरणी रामानंदनगर पोलिस ठाण्यात अकस्मात मृत्यूची नोंद करण्यात आली. चेतन मनोरंजन सोनवणे (38, रा.समतानगर) असे मृत तरुणाचे नाव आहे.

आत्महत्येचे कारण अस्पष्ट
चेतन सोनवणे हा पत्नी, दोन मुलांसह समतानगरात वास्तव्याला होता. हातमजुरी आणि मिळेल ते काम करून आपला उदरनिर्वाह करत होता. दरम्यान, मेहुणीचे लग्न असल्यामुळे त्याची पत्नी व मुले गेल्या काही दिवसांपासून बाहेरगावी गेले होते. सोमवारी त्या घरी येणार होत्या मात्र तत्पूर्वी घरी एकट्याच असलेल्या चेतनने शनिवार, 4 जून रोजी मध्यरात्री गळफास घेतला. रविवार, 5 जून रोजी सकाळी सहा वाजता नळांना पाणी आल्याने त्याचा चेतनचा भाऊ चेतनला झोपेतून उठवण्यासाठी त्याच्या घरी गेला असता ही घटना उघडकीस आली. जिल्हा शासकीय वैद्यकीय महाविद्यालयात शवविच्छेदन करुन मृतदेह नातेवाईकांच्या ताब्यात देण्यात आला. याबाबत रामानंदनगर पोलिस ठाण्यात अकस्मात मृत्यूची नोंद करण्यात आली. पुढील प्राथमिक तपास ज्ञानेश्वर पाटील, प्रवीण जगदाळे तपास करीत आहेत.