समाजातील वंचित घटकांसाठी उच्च शिक्षण महत्वाचे – अॅड. रावसाहेब करपे
शिक्रापूर : आपल्या ज्ञानाचा उपयोग विद्यार्थ्यांनी समाजासाठी करणे काळाची गरज असून समाजातील वंचित घटकांसाठी उच्च शिक्षण महत्वाचे असल्याचे मत अॅड. रावसाहेब करपे यांनी व्यक्त केले. तळेगाव ढमढेरे येथील शिक्षण प्रसारक मंडळाच्या साहेबराव शंकरराव ढमढेरे महाविद्यालयामध्ये तिसर्या पदवीदान समारंभ प्रसंगी प्रमुख पाहुणे म्हणून ते बोलत होते.
याप्रसंगी महाविद्यालयाचे प्राचार्य डॉ. प्रदीप पाटील, शिक्षण प्रसारक मंडळाचे संचालक महेश ढमढेरे, उपप्राचार्य डॉ. पराग चौधरी, परीक्षा विभाग प्रमुख डॉ. मनोहर जमदाडे, डॉ. दत्तात्रय वाबळे, डॉ. संदीप सांगळे, भूगोल विभाग प्रमुख डॉ. रवींद्र भगत, विद्यार्थी प्रतिनिधी अक्षय देंडगे यांसह आदी मान्यवर उपस्थित होते.
गुणवत्तेला पर्याय नाही
यावेळी करपे म्हणाले की, उच्च शिक्षणाची पदवी घेऊन बाहेर पडणार्या विद्यार्थ्यांनी सामाजिक बांधिलकी जोपासणे गरजेचे असून स्पर्धेच्या युगामध्ये गुणवत्तेला पर्याय नसून उच्च ध्येय घेऊन वाटचाल करावी. यावेळी विविध विषयात प्राविण्य मिळवून पदवी प्राप्त करणार्या पंचवीस विद्यार्थ्यांना पदवी ग्रहण करत मान्यवरांच्या सन्मानित करण्यात आले. सदर कार्यक्रमाचे सूत्रसंचालन भूगोल विभाग प्रमुख डॉ. रवींद्र भगत यांनी केले तर डॉ. मनोहर जमदाडे यांनी प्रास्ताविक केले व उपप्राचार्य डॉ. पराग चौधरी यांनी आभार मानले.