सरकारने आज अनुदान जाहीर केल्यास आंदोलन मिटवू-शेट्टी

मुंबई-अनेक दिवसांपासून शेतकरी दूध दरवाढीची मागणी करत आहेत. गेल्यावर्षी शेतकऱ्यांचा संप झाला होता. त्यावेळी दुग्धविकास मंत्री महादेव जानकर यांनी २७ रूपयांचा भाव जाहीर केला. पण तो दर शेतकऱ्यांना कधीच मिळाला नाही. राज्यात २० लाख लिटर दूध अतिरिक्त आहे. अतिरिक्त दुधावर सरकारने काहीच तोडगा काढला नाही. सरकारने जर आज विधानपरिषदेत शेतकऱ्यांच्या खात्यावर ५ रूपये अनुदान जमा करण्याची घोषणा केली तर आम्ही आजच आंदोलन मागे घेऊ, अशी ग्वाहीही त्यांनी दिली.

दुधाबाबत सरकारचे धोरण फसलेले आहे. मुख्यमंत्री देवेंद्र फडणवीस यांनी फक्त बघ्याची भूमिका घेतल्याची टीका, स्वाभिमानी शेतकरी संघटनेचे अध्यक्ष खासदार राजू शेट्टी यांनी केली. मुख्यमंत्र्यांनी आम्हाला चर्चेसाठी कधीच बोलावले नाही. त्यांनी निमंत्रण कधी दिले होते, असा सवाल करत मी कधी नकार दिला हे त्यांनी जाहीर करावे.

सरकारच्या चुकीच्या धोरणामुळे राज्यात दूध माफिया तयार झाले असून त्यांनी ५३ कोटींवर डल्ला मारल्याचा आरोप शेट्टी यांनी केला. दुधाचा धंदा हा तोट्याचा आहे. शेतकऱ्यांनी किती दिवस हे सहन करायचे. सरकारच्या आडमुठेपणामुळे शेतकरी रस्त्यावर उतरला आहे. आंदोलन आम्ही रात्री १२ वाजता सुरू करणार होतो. पण पोलिसांनी सरकारच्या आदेशावरून कार्यकर्त्यांना रविवारी ताब्यात घेण्यास सुरूवात केली. कार्यकर्त्यांच्या घरी महिलांना शिवीगाळ केली. त्यामुळे राज्यात संतप्त प्रतिक्रिया उमटल्या.

कार्यकर्त्यांनी दूध कमी प्रमाणात सांडले आहे. शेतकऱ्यांना दोष देऊ नका. त्यांनी विद्यार्थी, गोरगरीब आणि वारकऱ्यांना मोफत दूध वाटण्यात आले आहे. ९० टक्के दूध चांगल्या कामासाठी वापरले आहे. जाहीर केलेला भाव शेतकऱ्यांना मिळालेला नाही. प्रत्येक ठिकाणी वेगवेगळा भाव मिळतो. उत्पादन खर्चाच्या खूप कमी भाव आहे. केरळ, गोवा आणि कर्नाटक सरकार थेट उत्पादकाच्या खात्यावर अनुदान जमा करते. तसे आपल्या सरकारने करायला हवे, अशी मागणी त्यांनी केली.