सहआयुक्तालयात डुकरे सोडून शिवसेनेचे आंदोलन

नागरी समस्या सोडवण्यास प्रशासन अपयशी – नगरसेवक प्रमोद भानगिरे यांचा आरोप

हडपसर :- वारंवार आंदोलने करून निवेदने देऊनही डुकरे, पाणीपुरवठा,वाहतूक समस्या,अतिक्रमणे हे प्रश्न सुटत नसल्याने शिवसेनेचे नगरसेवक नाना भानगिरे, नगरसेविका प्राची आल्हाट यांनी हडपसर सहायुक्तालयात डुकरे सोडून उपोषण केल्याने प्रशासकीय अधिकारी यांची चांगलीच धांदल उडाली.

प्रभाग क्रमांक २६ मधील काळेपडळ, सातवनगर, हांडेवाडी रोड या भागात मोकाट डुकरे आणि अपुरा पाणीपुरवठा यामुळे नागरिक चांगलेच हैराण झाले आहेत. पथारी व्यावसायिक, अनधिकृत भाजी मंडई यामुळे रोज हांडेवाडी रोडवर वाहतूक कोंडी होते आहे, सयदनगर रेल्वे क्रॉसिंगवर भुयारी मार्गाचे काम मंजूर होऊनही अद्याप सुरू झालेले नाही हे सर्व प्रश्न सुटण्याकरिता वारंवार पत्रव्यवहार, निवेदने देऊनही प्रशासन काही हालचाल करत नसल्याने आज सहाएक आयुक्त कार्यालयात डुकरे सोडून उपोषण करण्याची वेळ आल्याचे नगरसेवक भानगिरे यांनी सांगितले, दिवसाआड अपुऱ्या पाणीपुरवठ्याने नागरिकांचे हाल होत आहेत, डुकरामुळे लोकांचे आरोग्य धोक्यात आले, पण पालिका प्रशासन काहीच करायला तयार नाही,केवळ आश्वासने देण्याचे काम अधिकारी वर्ग करत आहेत. इतर प्रभागानमध्ये नियमित रोज पाणी येते,पण प्रभाग क्र.२६ मध्ये मात्र दिवसाआड पाणी येत आहे,सर्वात जास्त टॅक्स या प्राभागातून पालिका मिळवते, पण सुविधा मात्र देत नाही असा आरोप करून भानगिरे यांनी आता पुणे मनपा आयुक्तालयात डुकरे सोडून पाणीप्रश्न, वाहतूक कोंडी,भुयारी मार्गाच्या कामासाठी तीव्र आंदोलन करणार असल्याचे स्पष्ट केले. या वेळी सहायक आयुक्त उपस्थित नसल्याने इतर शिवसैनिकांनी आंदोलन व उपोषण मागे घेण्यास नकार दिला.

या प्रसंगी आशिष आल्हाट, विकास भुजबळ, सचिन तरवडे, वीरभद्र गाभने, शिवा शेवाळे, म्हेत्रे काका, विनायक पाटील, सागर बाबर, संतोष जाधव आदींसह नागरिक मोठ्या संख्येने उपस्थित होते.