सहा दरोडेखोर गजाआड; भोसरी पोलिकांची कामगिरी

पिंपरी-चिंचवड : भोसरी पोलिसांनी सहा दरोडेखोरांना अटक केली आहे. त्यांच्याकडून दरोड्यातील 5 लाख 35 हजार 500 रुपयांचा ऐवज जप्त करण्यात आला आहे.
मागील गाडीला ओव्हरटेक करण्यासाठी जागा दिली नाही, या कारणावरून एका वकिलाला अडवून त्याला मारहाण करून लुटल्याचा प्रकार घडला. याबाबत वकिलाने भोसरी पोलिसात अज्ञात सहा जणांविरोधात फिर्याद दिली. त्यानुसार तपास पथकाने सहा आरोपींना अटक केली आहे. अतुल मुरलीधर नाईक (वय 23, रा. राधानगरी हाऊसिंग सोसायटी, दिघी रोड, भोसरी), आकाश महादेव काळपांडे (वय 24, रा. सावंत नगर, दिघी), गोकुळ कृष्णा निखाडे (वय 22, रा. आळंदी रोड, भोसरी), शुभम बाबुराव तायडे (वय 19, रा. आळंदी रोड, भोसरी), राजकुमार उमाजी डामसे (वय 20, रा. बनकर वस्ती, मोशी), जगदीश दिगंबर इंगळवाड (वय 18, रा. मोई, ता. खेड, जि. पुणे) अशी अटक करण्यात आलेल्या आरोपींची नावे आहेत.

पाच लाखांचा मुद्देमाल जप्त
वरील आरोपींकडे कसून चौकशी करून त्यांच्याकडून 8 मोबाईल फोन, सोन्याची चेन, 7 हजार 500 रुपये आणि 1 स्विफ्ट कार (एम एच 12 एच एल 8832) असा एकूण 5 लाख 35 हजार 500 रुपयांचा ऐवज जप्त करण्यात आला. तसेच हिंजवडी पोलीस ठाण्यातील खंडणीसाठी अपहरण केल्याचा एक गुन्हा उघडकीस आला आहे.

तपास पथक
ही कामगिरी उत्तर प्रादेशिक विभागाचे अप्पर पोलीस आयुक्त प्रदीप देशपांडे, परिमंडळ 3चे पोलीस उपआयुक्त गणेश शिंदे, सहाय्यक पोलीस आयुक्त सतीश पाटील, वरिष्ठ पोलीस निरीक्षक नरेंद्र जाधव, पोलीस निरीक्षक (गुन्हे) अजय भोसले यांच्या मार्गदर्शनाखाली पोलीस उपनिरीक्षक प्रमोद कठोरे, पोलीस उपनिरीक्षक काळुराम लांडगे, पोलीस कर्मचारी महादेव धनगर, विनायक म्हसकर, गणेश हिंगे, गणेश आव्हाळे, नितीन खेसे, संतोष महाडिक, बाळासाहेब विधाते, सागर भोसले, समीर रासकर यांनी केली.

भोसरी, फरासखाना ठाण्यातील तीन गुन्हे उघड
अलंकार प्रेम कांबळे (22, रा. इंदिरा नगर, खडकी बाजार, पुणे) याला भोसरी पोलिसांनी 17 मार्च रोजी ताब्यात घेतले. त्याच्याकडे कसून चौकशी केली असता त्याने भोसरी आणि फरासखाना पोलीस ठाण्याच्या हद्दीत तीन दुचाकी चोरल्याचे मान्य केले. त्याच्याकडून 93 हजार रुपये किमतीचा ऐवज जप्त करण्यात आला आहे. यामुळे भोसरी आणि फरासखाना पोलीस ठाण्यातील वाहनचोरीचे एकूण 3 गुन्हे उघडकीस आले आहेत.