साकीनाका परिसरात दहावीचा पेपर पुन्हा फुटला

मुंबई । अंबोली पोलीस दहावीचा पेपर फोडणार्‍यांचा पर्दाफाश करून त्यांना अटक करत नाहीत, तोच साकीनाका परिसरात पुन्हा दहावीचा पेपर फुटल्याची धक्कादायक बाब उघडकीस आली आहे. याप्रकरणी पोलिसांनी खासगी क्लासेसच्या दोन शिक्षकांना अटक केली आहे. फिरोज युसूफ अन्सारी (42) आणि मुज्जमिल इक्बाल काझी (27) अशी या दोघांची नावे आहेत. साकीनाकाच्या काजूपाडा परिसरातील सेंट ज्यूड हिंग स्कूल शाळेत दहावीच्या संगणकाचा पेपर फुटल्याचा प्रकार सकाळी उघडकीस आला.

संशयास्पद हालचालींवर विद्यार्थिनीचा मोबाइल तपासला
हा पेपर देण्यासाठी आलेली 15 वर्षीय विद्यार्थिनी पेपर सुरू होण्याच्या अर्धा तास आधी मोबाइलमध्ये पाहून पुस्तकात डोकावत होती. तिच्या या संशयास्पद हालचालींवर शाळेच्या शिक्षिका वनिता शेट्टी यांना संशय आल्याने त्यांनी त्या विद्यार्थिनीचा मोबाइल तपासला. त्यावेळी त्या विद्यार्थिनीच्या मोबाइलमध्ये व्हॉट्सअ‍ॅपवर दहावीचा पेपर दिसून आला. हा पेपर तिने तिच्या इतर 15 मित्र-मैत्रिणींना पाठवला होता. याची माहिती शिक्षिका शेट्टी यांनी तातडीने शाळेच्या मुख्याध्यापकांच्या कानावर घातली. तूर्तास त्या विद्यार्थिनीला परीक्षेला बसू देत मुख्याध्यापकांनी साकीनाका पोलिसांना पाचारण केले.

रन्स ट्युटोरिअल क्लासेसचे शिक्षक फिरोज अडचणीत
परीक्षा झाल्यानंतर शेट्टी यांच्या तक्रारीनुसार पोलिसांनी भादंवि कलम 5, 6, 7, 8 आणि महाराष्ट्र विद्यापीठ बोर्ड तसेच इतर गैरव्यवहार प्रतिबंधक कायदा 1982 सब 66(ड) नुसार गुन्हा नोंदवला आहे. पोलीस तपासात त्या मुलीला खैरानी रोडवरील तिच्या रन्स ट्युटोरिअल क्लासेसचे शिक्षक फिरोज यांनी हा पेपर पाठवल्याची कबुली तिने दिली. त्यानुसार पोलिसांनी फिरोज अन्सारीला अटक केली. फिरोजच्या चौकशीत त्याला हे पेपर मीरारोडचा ट्युशन टीचर मुज्जमिल इक्बाल काझीने पाठवल्याचे सांगितल्यानंतर पोलिसांनी मुज्जमिलला अटक केली आहे. मुज्जमिलने हा पेपर कसा मिळवला, याचा शोध साकीनाका पोलीस घेत आहेत.