सादरीकरणात पक्षिमित्र संमेलन रंगले

ठाणे । होप नेचर ट्रस्ट आणि महाराष्ट्र पक्षिमित्र संघटना यांच्या संयुक्त विद्यमाने गडकरी रंगायतन येथे आयोजित पक्षिमित्र संमेलन आयोजित करण्यात आले होते. अभ्यासपूर्ण सादरीकरण, व्याख्यानाने हे सत्र रंगले होते. सुरुवातीला बीएनएचएसचे डायरेक्टर डॉ. दीपक आपटे यांनी अमुर फाल्कन या ससाणाच्या जातीच्या संवर्धनाविषयी सादरीकरण केले. सुरूवातीला नागालँड येथे अमुर फाल्कनची केली जाणारी शिकार आणि त्यानंतर स्थानिकांमध्ये करण्यात आलेल्या जागृतीमुळे त्या ठिकाणी थांबलेली शिकार ही सर्व माहिती त्यांनी उदाहरणासह सादरीकरणात दिली.

पक्षी गणनावर सादरीकरण
विंडो बर्डिंग या विषयावर ठाण्यातील सीमा राजशिर्के यांनी सादरीकरण केले. आपल्या घरातील खिडकीतून त्यांनी टिपलेल्या पक्ष्यांचे छायाचित्र, त्यांची माहिती, त्यांचा स्वभाव, त्यांची नावे त्यांनी सादरीकरणातून दाखविली. डोंबिवलीत सुरू झालेल्या बर्ड रेस या विषयावर प्रथमेश देसाई याने सादरीकरण केले. रवींद्र साठे यांनी ठाणे पक्षी गणनावर सादरीकरण केले. ठाण्यात पक्षी गणनेला झालेली सुरुवात, कोणत्या ठिकाणी केली जाते, किती गटांत केली जाते याची माहिती सादरीकरणातून पक्षिमित्रांना पाहायला मिळाली. त्यानंतर नेचर कन्झर्वेशन सोसायटी ऑफ नाशिकच्या प्रतिनिधी प्रतीक्षा कोथुळे हिने सादरीकरण केले. डॉ. सुधाकर कुर्‍हाडे यांनी अहमदनगरमधील पक्षी आणि त्यांचे संवर्धन याविषयी माहिती दिली. यात त्यांनी ‘चला पक्षी पाहू या’ या स्तुत्य उपक्रमाची माहिती सांगितली.