साने गुरूजी विद्यालयातील बेकायदेशीर शिक्षकेतर भरती रद्द करण्यासह दोषींवर व्हावेत गुन्हे दाखल

यावल- नगरपालिका संचलीत साने गुरुजी माध्यमीक व उच्च माध्यमिक विद्यालयात झालेली बेकायदेशीर शिक्षकेतर कर्मचारी भरती रद्द करण्यात यावी, पदाचा दुरुपयोग करणार्‍या शालेय शिक्षण समिती अध्यक्ष व मुख्याध्यापक यांच्यावर गुन्हे दाखल करण्याची मागणी माजी नगराध्यक्ष व विद्यमान नगरसेवक अतुल पाटील यांनी परीषदेत केली.

परवानगीविनाच केली भरती
नगरसेवक अतुल पाटील यांनी घेतलेल्या पत्रकार परीषदेत ते म्हणाले की, नगरपालिका संचलीत साने गुरुजी माध्यमिक व उच्च माध्यमिक विद्यालयात शालेय समितीचे सभापती दीपक रामचंद्र बेहडे व शालेय समितीचे सचिव तथा मुख्याध्यापक एस.आर.वाघ यांनी संगनमत करून शिक्षक भरतीसाठी आवश्यक असलेल्या शिक्षण विभागाच्या नियमांना धाब्यावर बसवून आर्थिक लाभासाठी शिक्षण विभागाची परवानगी न घेता 23 फेबु्वारी 2019 रोजी दोन वर्तमान वृतपत्रात कनिष्ठ लिपीक एक व प्रयोगशाळा सहाय्यक तीन अशा एकूण चार पदांसाठी अनधिकृतपणे जाहिरात प्रसिद्ध केली व 8 मार्च रोजी लेखी व तोंडी मुलाखती घेतल्या. या विद्यालयाच्या शालेय समितीचे अध्यक्ष दीपक रामचंद बेहडे व मुख्याध्यापक एस.आर.वाघ यांनी केलेल्या मुलाखतीच्या वेळी उपस्थित राहण्याच्या विनंतीस स्विकारून आम्ही 8 मार्च 2019 रोजी शिक्षकेतर कर्मचारी भरती मुलाखतीस उपस्थित होतो. सदरच्या या शिक्षकेतर भरती संदर्भात आपण शासनाची परवानगी घेतली आहे का? अशी विचारणा शालेय समितीच्या अध्यक्ष व मुख्याध्यापक यांना विचारणा केली असता परवानगी घेतली असल्याचे त्यांनी सांगितले. शासन परवानगीचे पत्र मागितले असता मुलाखतीला आलेल्या उमेदवारांची गर्दी आहे नंतर आपणास हे पत्र दाखवू, असे ते म्हणाले मात्र प्रत्यक्षात जिल्हा परीषद, जळगावच्या शिक्षण विभागाकडे या भरती प्रक्रियेसंदर्भात कुठलीही परवानगी दिली नसल्याची माहीती समोर आली.

दोषींवर गुन्हा दाखल करण्याची मागणी
अतिरिक्त शिक्षकेतर कर्मचारी यांचे समायोजन केल्याशिवाय शिक्षण विभाग परवानगी देवू शकत नाही, असे शिक्षण विभागाच्या वतीने सांगण्यात आले. अश्या कुठल्याही प्रकारची भरती प्रक्रीया पुर्ण केली नसतांना शालेय समितीचे अध्यक्ष दीपक रामचंद्र बेहडे यांनी आपला आर्थिक स्वार्थ साध्य करण्यासाठी बेकायदेशीररीत्या वर्तमान पत्रात जाहिरात प्रसिद्ध करून नोकरी लावण्याच्या नावाखाली बेरोजगारांची फसवणूक केली आहे. ही शिक्षकेतर कर्मचार्‍यांची भरती प्रक्रीया रद्द करावी व लोकसभा निवडणुकीची आचारसंहिता सुरू असताना तिचा भंग करणार्‍या शालेय समितीचे अध्यक्ष दीपक रामचंद्र बेहडे व समितीचे सचिव मुख्याध्यापक एस.आर.वाघ यांच्यावर तत्काळ कार्यवाही करण्यात यावी, अशी मागणी पाटील यांनी केली आहे. जिल्हाधिकारी तसेच जिल्हा शिक्षण अधिकारी तसेच रावेर निवडणूक अधिकारी यांच्याकडे तक्रार केल्याचे ते म्हणाले. प्रसगी नगरपालिकेचे उपनगराध्यक्ष राकेश मुरलीधर कोलते, मुबारक तडवी, शेख असलम शेख नबी, धीरज महाजन, गणेश महाजन, हाजी फारूख, राजेश महाजन उपस्थित होते. दरम्यान, समितीचे अध्यक्ष दीपक बेहडे यांनी लवकरच आपली भूमिका स्पष्ट करणार असल्याचे सांगितले.