सुप्रिम कॉलनीत कामगारावर चाकूने वार

एमआयडीसी पोलिसात सहा जणांविरोधात गुन्हा दाखल

जळगाव- काय रे दादा झाला, तुला जास्त झाल का, तुझी मस्ती जिरवावी लागेल, अशी दमदाटी शिवीगाळ करत चारचाकीतून आलेल्या सहा जणांनी कंपनी कामगाराला बेदम मारहाण केल्याची घटना शुक्रवारी पहाटे दीड वाजता सुप्रिम कॉलनी गजानन महाराज मंदिराजवळ घडली. यात एकाने चाकू हल्ला केल्याने कामगार जखमी असून त्याच्यावर जिल्हा रुग्णालयात उपचार सुरु आहेत.

सुप्रिम कॉलनीतील गजाजन महाराज मंदिराजवळ आकाश दिलीप परदेशी हे कुटूंबासह राहतात. रात्री नेहमीप्रमाणे कंपनीतून घरी आल्यावर जेवण करुन ते झोपले. रात्री दीड वजाता घराच्या दरवाजाचा ठोकण्याचा आवाज आला असता, ते उठले. काही कळण्याच्या आत निलेश सपकाळे, रुपेश सोनार दोघे रा. जैनाबाद, अनिल घुले, रा. रामेश्‍वर कॉलनी, राधे शिरसाठ रा.सुप्रिम कॉलनी हे आले. निलेशने चाकू लावून परदेशी यांना घराबाहेर आणले व दमदाटी केली. यावेळी रुपेशने हातातील चाकू परदेशी यांच्या दंडावर मारला. व सोबतच्या इतरांनीही काठ्यांनी मारहाण केली. आई सोडविण्यास आली असता, तिलाही शिवीगाळ करत दमदाटी केली. यानंतर चौघे कार (क्र. 0007 ) मधून निघून गेले. दरम्यान जखमी अवस्थेत कुटुंबियांनी परदेशी यांना जिल्हा रुग्णालयात दाखल केले. त्यांच्यावर उपचार सुरु आहे. याप्रकरणी परदेशी यांच्या फिर्यादीवरुन एमआयडीसी पोलिसात निलेश सपकाळे, रुपेश सोनार दोघे रा. जैनाबाद, अनिल घुले, रा. रामेश्‍वर कॉलनी, राधे शिरसाठ रा.सुप्रिम कॉलनी व इतर दोन जण अशा सहा जणांविरोधात गुन्हा दाखल करण्यात आला आहे.