सुरक्षेचा लेखा-जोखा द्या; अन्यथा मेट्रोचे काम बंद पाडू 

पिंपरी चिंचवड : पुणे-मुंबई महामार्गावरील कासारवाडी येथे शनिवार (दि. 5) रोजी दुपारी मेट्रोची ड्रिल मशिन उलटल्याची मोठी दुर्घटना घडली. याबाबत मेट्रोकडून जोपर्यंत सेफ्टी ऑडीट आणि स्ट्रक्चरल ऑडीटचा अहवाल जाहीर होत नाही, तोपर्यंत पिंपरी चिंचवड महापालिकेच्या हद्दीतील महामेट्रोचे पुर्ण काम थांबवावे, अशा दुर्घटना पुन्हा घडू नयेत म्हणून सुरक्षितते संबंधात उपाय योजना कराव्यात. तसेच या प्रकरणाची तज्ज्ञ समितीमार्फत चौकशी करण्यात यावी, अशी मागणी पिंपरी चिंचवड शहर राष्ट्रवादी युवक काँग्रेसच्या वतीने करण्यात आली. यासंदर्भात, महापालिका आयुक्त आणि महामेट्रो प्रशासनास निवेदन देण्यात आले आहे.

विशाल वाकडकर यांनी म्हटले आहे की, पिंपरी चिंचवड मनपा हद्दीत सुरु असणार्‍या महामेट्रोच्या कामाचे तज्ज्ञ समिती किंवा त्रयस्त संस्थेमार्फत सेफ्टी ऑडीट आणि स्ट्रक्चरल ऑडीट करावे. त्याचा अहवाल सर्व नागरिकांसाठी वृत्तपत्रांतून प्रसिध्द करावा. शनिवारी झालेल्या अपघातास जबाबदार असणार्‍या अधिकार्‍यांवर, ठेकेदारांवर कडक कारवाई करावी, असेही त्यांनी नमूद केले.

यावेळी, नगरसेविका उषा वाघेरे, निकिता कदम, नगरसेवक राजु बनसोडे, ऋषिकेश वाघेरे पाटील, कुणाल थोपटे, प्रतिक साळुखे, सचिन मोकाशी, आलोक गायकवाड, भागवत जवळकर, महेश किवळे, प्रशांत सपकाळ, विशाल पवार, धनंजय जगताप, धनाजी ताबे, सचिन मोरे आदी कार्यकर्ते उपस्थित होते. नागरिकांच्या जिवीत व मालमत्तेचे नुकसान होणार नाही, याबाबत दक्षता घेण्यात यावी, अन्यथा पिंपरी चिंचवड शहर राष्ट्रवादी युवक काँग्रेसच्या वतीने तीव्र आंदोलन करण्यात येईल, असा इशारा वाकडकर यांनी प्रशासनास दिला आहे.