‘स्कीमर बोट’ प्रकल्पास राज्य पातळीवर प्रथम क्रमांक

कृष्णराव भेगडे शाळेने राबविला उपक्रम
तळेगाव  : कृष्णराव भेगडे शाळेच्या विद्यार्थ्याच्या ‘स्कीमर बोट’ प्रकल्पास राज्य पातळीवर प्रथम क्रमांक मिळाला आहे. आता या प्रकल्पास राष्ट्रीय पातळीवर संधी मिळणार आहे. कृष्णराव भेगडे इंग्लिश मिडीयम स्कूलच्या इ.5 वी च्या विद्यार्थ्यांनी चाकण येथे महिंद्रा कंपनीतर्फे घेण्यात आलेल्या ‘स्कीमर बोट’ बनविण्याच्या स्पर्धेत राज्यस्तरावर प्रथम क्रमांक पटकावला. आता हे विद्यार्थी राष्ट्रीय स्तरावर 22 डिसेंबर रोजी चंदिगड येथे होणार्‍या स्पर्धेत भाग घेणार आहेत. या सर्व यशस्वी विद्यार्थ्यांचे संस्थेचे संस्थापक चंद्रकांत काकडे, संस्थेचे अध्यक्ष संदिप काकडे, शाळेचे अध्यक्ष डॉ.दिलीप भोगे यांनी अभिनंदन केले. तसेच शाळेच्या मुख्याध्यापिका मीना अय्यर यांनीही खूप कौतुक केले. या सर्वांनी विद्यार्थ्यांना पुढील स्पर्धेसाठी खूप खूप शुभेच्छा दिल्या.

शिक्षकांनी केले सहकार्य
यावेळी चंद्रकांत काकडे यांनी सांगितले की, मुलांनी केलेला हा प्रकल्प खरोखर वाखाणण्यासारखा आहे. त्यांनी या स्पर्धेत मिळविलेले यशामुळे शाळेचे नाव मोठे झाले आहे. मुलांनी कल्पनाशक्ती दाखवून हा प्रकल्प तयार केला आहे. अर्थात त्यांना शाळेतील शिक्षकांनी केलेल्या सहकार्यामुळे हे शक्य झाले. त्यामुळे हे विद्यार्थी आणि शिक्षक दोघेही कौतुकास पात्र आहेत. महिंद्रा कंपनीतर्फे घेण्यात आलेल्या या स्पर्धेत सिद्धार्थ काकडे, वरदायिनी डाळिंबीकर, प्रतिभा पाटील, धनंजय ठोकळ या विद्यार्थ्यांनी सहभाग घेतला होता. या विद्यार्थ्यांचा ‘टर्न टेस्ट व वजन‘ मध्ये प्रथम क्रमांक आला. त्यानंतर घेण्यात आलेल्या एकूणच सर्व चाचण्यांमध्येही शाळेच्या विद्यार्थ्यांचा प्रथम क्रमांक आला. तसेच इ.6 वी च्या विद्यार्थ्यांचाही ‘जेट टॉय ‘ या प्रकल्पासाठीच्या सादरीकरणासाठी प्रथम क्रमांक आला. यात श्रुती झावरे, उन्नती ठाकूर, रौनक यादव व जगन पांडा यांनी सहभाग घेतला होता. या सर्व विद्यार्थ्यांना शाळेच्या शिक्षिका निशा सराफदार, पद्मजा सातव व शताब्दी गुप्ता यांनी मार्गदर्शन केले.