‘स्थायी’त लवकरच खांदेपालट!

पिंपरी-चिंचवड – पिंपरी-चिंचवड महापालिकेच्या स्थायी समितीच्या आठ सदस्यांची फेब्रुवारीअखेर मुदत संपणार आहे. समितीच्या 16 सद्स्यांपैकी 8 नगरसेवकांना समितीतून बाहेर पडावे लागणार आहे. सात फेब्रुवारीला ’ड्रॉॅ’ काढला जाणार आहे. त्यामुळे कोणत्या नगरसेवकांना समितीतून बाहेर पडावे लागते, याकडे सगळ्यांचे लक्ष लागले आहे. महापालिका स्थायी समितीमध्ये 16 सदस्य आहेत. त्यांच्या सदस्यत्वाचा कालावधी दोन वर्षांचा आहे. सार्वत्रिक निवडणुकीनंतर त्यातील पहिले आठ सदस्य पहिल्या वर्षानंतर निवृत्त होतात. ती नावे चिठ्ठी काढून निश्‍चित केली जातात.

चिठ्ठीद्वारे होणार निवडी
फेब्रुवारीच्या सभेत नवीन सदस्यांची नियुक्ती होणार आहे. त्याअगोदर ही प्रक्रिया पूर्ण करणे बंधनकारक आहे. त्यामुळे सात फेब्रुवारीला ड्रॉ काढण्यात येणार आहे. स्थायी समिती सभापतींच्या अध्यक्षतेखाली होणार्‍या सभेत आठ सदस्यांच्या नावाचा चिठ्ठी काढली जाईल व ते समितीतून बाहेर पडतील. स्थायी समितीमध्ये अध्यक्षा सीमा सावळे, आशा शेंडगे, लक्ष्मण उंडे, कुंदन गायकवाड, प्रा. उत्तम केंदळे, उषा मुंडे, माधुरी कुलकर्णी, हर्षल ढोरे, निर्मला कुटे, कोमल मेवाणी (भाजप), राष्ट्रवादी काँग्रेसकडून अनुराधा गोफणे, वैशाली काळभोर, मोरेश्‍वर भोंडवे, राजू मिसाळ, शिवसेनेचे अमित गावडे आणि अपक्षांचे गटनेते कैलास बारणे हे सदस्य आहेत. त्यापैकी आठजणांची चिठ्ठी निघेल. त्यानंतर नवीन आठ सदस्यांची फेब्रुवारी महिन्याच्या महासभेत निवड केली जाणार आहे.

वरिष्ठांकडे आतापासून फिल्डिंग
सत्ताधारी भाजपने स्थायी समितीत पाच वर्षात दरवर्षी दहा याप्रमाणे पन्नास नगरसेवकांना संधी देण्याचा निर्णय घेतला असल्याचे बोलले जाते. त्यामुळे भाजपकडून विद्यमान दहा सदस्यांना स्थायी समिती सदस्यपदाचा राजीनामा द्यायला लावून नवीन दहा सदस्यांना संधी दिली जाऊ शकते. स्थायी समितीतील पक्षीय बलालबल: भाजप दहा, राष्ट्रवादी काँग्रेस चार, शिवसेना एक आणि अपक्ष एक असे आहे. दरम्यान, स्थायी समितीमध्ये आपली वर्णी लागावी, यासाठी आत्तापासूनच नगरसेवकांनी आपल्या वरिष्ठांकडे ’फिल्डिंग’ लावण्यास सुरुवात केली आहे.