‘स्वच्छता अ‍ॅप’ची अधिकार्‍यांसह कुटुंबियांना सक्ती
पिंपरी-चिंचवड : ‘स्वच्छ सर्वेक्षण 2018’ या चार हजार गुणांच्या ‘स्वच्छ’ परीक्षेत अग्रक्रमावर येण्यासाठी पिंपरी-चिंचवड महापालिकेतील अधिकारी आणि त्यांच्या कुटुंबियांना स्वच्छता अ‍ॅप डाऊनलोड करणे बंधनकारक केले आहे. याबाबतचा आदेशच आयुक्त श्रावण हर्डीकर यांनी काढला आहे. तसेच कर्मचार्‍यांची वेतन देयके सादर करताना अ‍ॅप डाऊनलोड केल्याची माहितीही सादर करावी लागणार आहे.
नागरिकांनाही आवाहन
शहरात 4 जानेवारीपासून स्वच्छ भारत सर्वेक्षण सुरू होणार आहे. या सर्वेक्षणासाठी जनजागृती मोहीम सुरू आहे. या सर्वेक्षणातील महत्त्वाचा भाग स्वच्छता अ‍ॅप डाऊनलोड करणे हा आहे. अधिकाधिक स्वच्छता अ‍ॅप डाऊनलोड करून त्याप्रमाणे अ‍ॅपच्या माध्यमातून तक्रारी व त्यांचे संगणकीय प्रणालीव्दारे निराकरण करण्याला गुणांकन आहे. हे गुणांकन मिळवून स्वच्छ भारत अभियानात शहराला चांगला क्रमांक मिळवण्याचा प्रयत्न सुरू आहे. त्यात स्वच्छता अ‍ॅप डाऊनलोड करण्यासाठी नागरिकांना आवाहन केले जात आहे.
26 डिसेंबर अंतिम मुदत
महापालिकेच्या गुणांकनासाठी अ‍ॅप डाऊनलोड करणे अगत्याचे असल्याने आणि अ‍ॅप डाऊनलोड झालेला आकडा वाढविण्यासाठी पालिकेने नामी शक्कल लढविली आहे. पालिकेतील अधिकारी, त्यांच्या कुटुंबियांना अ‍ॅप डाऊनलोड करणे बंधनकारक केले आहे. अधिकारी, कर्मचारी व त्यांच्या कुटुंबियांच्या मोबाईलमध्ये अ‍ॅप डाऊनलोड झाले की नाही, हे बघण्याची जबाबदारी प्रत्येक विभागातील आहरण-वितरण अधिकार्‍यांवर सोपविली आहे. खातरजमा करून कर्मचार्‍यांची वेतन देयके जमा करताना लेखी स्वरुपात अ‍ॅप डाऊनलोड केल्याचा अहवालही या अधिकार्‍यांनी सादर करायचा आहे. तसेच अधिकारी, कर्मचार्‍यांनी मित्र परिवारातील सदस्यांना स्वच्छता अ‍ॅप डाऊनलोड करण्याबाबत प्रेरित करावे. अ‍ॅप डाउनलोड करण्यासाठी तांत्रिक सहाय्य करावे. ही कार्यवाही येत्या 26 डिसेंबरपर्यंत पुर्ण करण्यात यावी, असे याबाबतच्या आदेशात म्हटले आहे.