स्वस्त धान्याचा जळगावात काळाबाजार उघड : अडीच लाखांचा धान्यसाठा जप्त

जळगाव : गोरगरीबांच्या हक्काचे स्वस्त धान्य काळ्याबाजारात विक्री होत असल्याचा प्रयत्न उघडकीस आल्यानंतर अडीच लाखांचा धान्यसाठा जप्त करण्यात आला असून एका विरोधात जळगाव शहर पोलिस ठाण्यात गुन्हा दाखल करण्यात आला.

एकाविरोधात गुन्हा दाखल
शिवाजी नगरातील दूध फेडरेशनजवळील राजमालती नगरातील मेहमूद बिसमिल्ला पटेल (रा.राजमालती नगर) यांच्या घरातून रेशनचा माल अवैधरित्या व परस्पर काळ्याबाजारात जात असल्याची माहिती दीपक गुप्ता यांनी तहसीलदार नामदेव पाटील यांना कळविली होती. त्यानुसार नामदेव पाटील यांनी सोमवार, 6 जून रोजी सायंकाळी पुरवठा तपासणी अधिकारी डिगंबर भिकन जाधव यांच्यासह पथक घटनास्थळी रवाना केले होते. या पथकाने केलेल्या चौकशी सदरचे धान्य रेशनचे असल्याचे निष्पन्न झाले, मात्र त्याच्याजवळ कोणत्याच पावत्या नव्हत्या. अखेर तहसीलदार यांच्या पथकाने 22 हजार 500 रुपये किंमतीचा 15 क्विंटल गहू व दोन लाख 25 हजार किमतीचा 90 क्विंटल तांदूळ, एक हजार रुपये किंमतीच्या धान्याच्या गोण्या असा एकूण दोन लाख 48 हजार 500 रुपये किंमतीचा साठा व मालवाहू वाहने (एम.एच.06 ए.क्यू.2124) आणि (एम.एच.19 सी.वाय.6067) जप्त केली. पुरवठा तपासणी अधिकारी डिगंबर भिकन जाधव (रा.रायसोनी नगर) यांच्या फिर्यादीवरुन मेहमूद पटेल यांच्याविरोधात शहर पोलीस ठाण्यात गुन्हा दाखल करण्यात आला. पुढील तपास सहाय्यक पोलिस निरीक्षक संदीप परदेशी करीत आहे.