हायप्रोफाईल सेक्स रॅकेटचा पर्दाफाश

पुणे । शहरातील पंचतारांकित हॉटेलमध्ये सुरू असलेल्या वेशाव्यवसायावर सामाजिक सुरक्षा विभागाने छापा टाकून दोन मुलींची सुटका केली. या मुलींमध्ये एक तुर्कमेनिस्तानच्या मुलीचा समावेश आहे. या प्रकरणी पोलिसांनी सहा जणांना अटक केली आहे. कृष्ण सिंग, गणेश लंगडा, आयाम, युवराज, शिवा आणि सुरज अशी त्यांची नावे आहेत. मंगळवारी (दि. 7) ही कारवाई करण्यात आली.

कॅम्प परिसरातील एका पंचतारांकित हॉटेलमध्ये भारतीय आणि परदेशी मुलींना पैशाचे आमिष दाखवून वेश्याव्यवसायाला प्रवृत्त केले जात असल्याची माहिती सामाजिक सुरक्षा विभाग, गुन्हे शाखेला मिळाली होती. कृष्णा सिंग हा आपल्या साथीदार एजंटच्या मदतीने वेगवेगळ्या ठिकाणच्या मुली वेश्याव्यवसायाला मिळवून देत होता. वेगवेगळ्या हॉटेलमध्ये त्यांच्या नावाने रूम घेत असे. त्यानंतर ग्राहकांशी संपर्क साधून रक्कम ठरवून त्यांना या मुलींकडे पाठवत असे. मिळालेल्या माहितीनुसार अनैतिक मानवी वाहतूक प्रतिबंधक कक्ष, गुन्हे शाखेचे पोलीस निरीक्षक संजय पाटील यांच्या मार्गदर्शनाखाली कॅम्प परिसरातील एका पंचतारांकित हॉटेलवर छापा टाकण्यात आला. गुन्हे शाखेचे अप्पर पोलिस आयुक्त प्रदीप देशपांडे, उपायुक्त पंकज डहाणे, सहायक पोलिस आयुक्त संजय निकम यांच्या मार्गदर्शनाखाली ही कारवाई करण्यात आली.