होय आम्हीच नरेंद्र दाभोलकरांवर गोळ्या झाडल्या; आरोपीची कबुली

पुणे: महाराष्ट्र अंधश्रद्धा निर्मूलन समितीचे कार्याध्यक्ष डॉ.नरेंद्र दाभोलकर यांची पुण्यात २०१३ साली गोळ्या झाडून हत्या करण्यात आली होती. या हत्याप्रकरणी पोलिसांनी २०१८ साली शरद कळसकर व सचिन अंदुरे या सनातनच्या दोन युवकांना अटक केली आहे. शरद कळसकर याची न्यायवैद्यकीय चाचणी करण्यात आली असता, त्याने डॉ. नरेंद्र दाभोलकर यांच्यावर गोळीबार केल्याची कबुली दिली आहे. मी व सचिन अंदुरे मिळून गोळ्या घातल्याचे सीबीआयने केलेल्या न्यायवैद्यकीय चाचणीत म्हटले आहे.

सीबीआयने या संबंधीचा अहवाल मंगळवारी विशेष न्यायालयात सादर केला. शरद कळसकरने न्यायवैद्यकीय चाचणीत त्याचे वकील संजीव पुनाळेकर यांचे नाव घेतले आहे. डॉ. नरेंद्र दाभोलकर हत्या प्रकरणात वकील संजीव पुनाळेकर सुद्धा अटकेत आहेत. रविवारी पुणे न्यायालयाने संजीव पुनाळेकर यांना सहा जुलैपर्यंत न्यायालयीन कोठडी सुनावली आहे. २०१८ मध्ये पुनाळेकरांची भेट घेतली असता त्यांनी मला शस्त्र नष्ट करण्याचा सल्ला दिला होता असे त्यांनी सांगितले आहे.

फेब्रुवारी २०१९ मध्ये सीबीआयकडून विशेष न्यायालयात दाखल करण्यात आलेल्या दोषारोपपत्रासोबत न्यायवैद्यकीय चाचणीचा अहवाल जोडण्यात आला होता. सीबीआयचे विशेष सरकारी वकील अॅड. प्रकाश सुर्यवंशी यांनी मंगळवारी या अहवालाचा आधार घेऊन बाजू मांडली.