होर्डिंग दुर्घटनाग्रस्तांना मिळणार अतिरिक्त नुकसान भरपाई

0

सदोष मनुष्यवधासह रस्ते अपघाताची कलमे लावणार; पोलिसांना दहा दिवसांची मुदत

पुणे : शाहीर अमर शेख चौकामध्ये होर्डिंग कोसळून झालेल्या दुर्घटनेतील मृतांचे नातलग आणि जखमींना वाढीव नुकसान भरपाई मिळण्यासाठी या प्रकरणात सदोष मनुष्यवधासह रस्ते अपघाताची कलमे लावण्याचे अखेर मान्य करण्यात आले आहे. पालकमंत्री गिरीश बापट यांच्या अध्यक्षतेखाली झालेल्या बैठकीत याबाबत निर्णय घेण्यात आला असून, याबाबतच्या कार्यवाहीसाठी पोलिसांना दहा दिवसांची मुदत देण्यात आली आहे. या निर्णयामुळे दुर्घटनाग्रस्तांना अतिरिक्त नुकसान भरपाई मिळण्याचा मार्ग मोकळा होऊ शकेल.

रेल्वेच्या जागेत असलेले होर्डिंग कोसळून 5 ऑक्टोबरला चार जणांचा मृत्यू झाला होता. या दुर्घटनेत दहा जण जखमी झाले आहेत. पोलिसांनी या प्रकरणात सदोष मनुष्यवधाचा गुन्हा दाखल केला आहे. त्याचप्रमाणे रेल्वेकडून मृतांच्या नातलगांना प्रत्येकी पाच लाख, तर गंभीर जखमींना एक लाख रुपयांची मदत देण्यात आली. मात्र, दुर्घटनेत बळी गेलेल्यांचा व्यवसाय आणि त्यांचे वयोमान लक्षात घेता त्यांना वाढीव नुकसान भरपाई मिळणे आवश्यक आहे. त्यासाठी या प्रकरणात रस्ते अपघातानुसार कलमे लावावीत. त्यानुसार वाढीव नुकसान भरपाई मिळू शकेल, अशी मागणी सुरुवातीला आम आदमी रिक्षा संघटनेने केली. त्यासाठी आंदोलनही करण्यात आले. मात्र, पोलीस मागणीला दाद देत नसल्याने संघटनेने याबाबत न्यायालयात जाण्याचा निर्णय घेतला होता. बापट यांच्या अध्यक्षतेखाली याबाबत बैठक घेण्यात आली. जिल्हाधिकारी नवल किशोर राम, पोलीस उपायुक्त अशोक मोराळे, श्रीकांत आचार्य उपस्थित होते. अतिरिक्त मदत मिळवून देण्यासाठी सकारात्मक असल्याचे बापट व जिल्हाधिकार्‍यांनी स्पष्ट केले. याबाबत कायदेसल्लागाराशी बोलून निर्णय घेण्यात येईल.