अंगणवाडी कर्मचार्‍यांची बैठक फिस्कटली
मुंबई । अंगणवाडी कर्मचार्‍यांचा संप आणखी चिघळल्याचे सध्या चित्र पाहायला मिळत आहे. अर्थमंत्री सुधीर मुनगंटीवार यांच्यासोबत शिष्टमंडळाची बैठक फिस्कटली आहे. शिष्टमंडळातील प्रतिनिधी दिलीप उटाणे यांनी येत्या 8 दिवसांत मुख्यमंत्र्यांसोबत बैठक घेण्याच्या मुद्द्यावर संप मागे घेण्याचे आवाहन मुनगंटीवार यांनी केले, पण निर्णय होत नाही, तोपर्यंत संप मागे घेणार नसल्याची भूमिका कृती समितीने घेतली. परिणामी, चर्चा फिस्कटल्याने आंदोलन अधिक तीव्र करण्याचा निर्णय कृती समितीने जाहीर केला आहे. त्यात सरकारने खोटे आश्वासन दिले म्हणून प्रत्येक जिल्ह्यात सरकारची अंत्ययात्रा काढणार असल्याचे उटाणे यांनी स्पष्ट केले आहे. वेतनवाढीसाठी सरकारने मानधन वाढ समिती गठित केली होती. समितीने सादर केलेल्या शिफारशीनुसार मानधन वाढी संदर्भात मे 2017 पर्यंत सरकारी आदेश काढण्याचे आश्वासन महिला व बालविकास मंत्री पंकजा मुंडे यांनी दिले होते. मात्र आजपर्यंत याबाबत सरकारी पातळीवर कोणतीही कारवाई झालेली नाही. म्हणून राज्यातील 2 लाख अंगणवाडी कर्मचारी संपावर गेल्या आहेत.
शासनाने आश्वासन पूर्ण केले नसल्याचा अंगणवाडी कर्मचार्‍यांचा आरोप
शासनाने अंगणवाडी कर्मचार्‍यांच्या मानधनवाढीसाठी महिला व बाल विकास विभागाचे प्रधान सचिव यांच्या अध्यक्षतेखाली एक अभ्यास समिती स्थापन केली होती. या समितीने अंगणवाडी कर्मचार्‍यांना इतर राज्यांत मिळणारे मानधन व इतर सुविधा यांचा अभ्यास करून राज्यातील 97 हजार सेविका आणि 96 हजार मदतनीस, तसेच 12 हजार मिनी अंगणवाडी सेविका यांना सेवा ज्येष्ठतेनुसार मानधनवाढीचा अहवाल शासनाला दिला. मात्र शासन मानधनवाढ करीत नसल्याने कृती समितीने 11 सप्टेंबरपासून बेमुदत संप करण्याची घोषणा केली. तसेच कृती समितीच्या नेतृत्वाखाली राज्यातील दोन लाख अंगणवाडी कर्मचारी 22 ऑगस्टपासून असहकार आंदोलनात सहभागी झाले आहेत, असे कृती समितीचे निमंत्रक दिलीप उटाणे यांनी सांगितले.
बेमुदत संपामुळे राज्यातील पोषण आहार व लसीकरण सेवा ठप्प
सोमवारपासून बेमुदत संप पुकारलेल्या राज्यातील अंगणवाडी कर्मचार्‍यांचा मोर्चा मंगळवारी आझाद मैदानावर धडकला. हजारोंच्या संख्येने एकवटलेल्या कर्मचार्‍यांनी आजाद मैदान हाऊसफुल्ल झालं आहे. परिणामी, कर्मचार्‍यांनी महापालिका मार्गाचा पदपाथ कब्जा केला. अंगणवाडी कर्मचार्‍यांनी पुकारलेल्या संपामुळे राज्यातील पोषण आहार व लसीकरण सेवा ठप्प पडली आहे. त्यामुळे कुपोषण वाढीची भीती व्यक्त केली जात आहे.