अंगावरील दागिणे लुटून महिलेचे हातपाय बांधून दोघे भामटे पसार

शहरातील रिंगरोड हरेश्‍वर नगरात धक्कादायक प्रकार

जळगाव :– घराच्या कंपाऊंड मध्ये दडून बसलेल्या दोघा भामट्यांनी पाणी भरण्यासाठी उठलेल्या विवाहितेचे हात पाय बांधुन तिच्या अंगावरील दागिन ओरबडून पसार झाल्याची धक्कादायक घटना सोमवारी पहाटे घडली. चार वाजता नळाचे पाणी भरण्यासाठी उठलेल्या असतांना सुनीता सोनार यांच्या अंगावरील दागिने लूटल्याने परिसरात एकच खळबळ उडाली असून जिल्हापेठ पोलिसांत गुन्ह्याची नोंद करण्याचे काम सुरु होते.

पाणी भरण्यासाठी उठल्या अन् भामट्यांची झडप
जळगाव शहरातील रिंगरोड हरेश्‍वरनगरात सुनीता सुनील सोनार (वय-35) या कुटूंबीयांसह वास्तव्यास आहेत. पती सुनील यांचे फेमस चाट म्हणुन व्यवसाय आहे. 24 रोजी पहाटे तीन वाजता नेहमीप्रमाणे मनपातर्फे पाणी पुरवठा करण्यात आला. पाणी आल्याने परिसरातील इतर रहिवाश्यांप्रमाणे सुनीताही पाणी भरण्यासाठी उठल्या होत्या. पिण्याचे पाणी झाल्यावर टाकीत पाणी लावल्यानंतर नळाचा कॉक फिरवण्यासाठी त्या घरात कंपाऊंड मध्ये आल्यावर पुर्वी पासूनच दडून बसलेल्या दोघा भामट्यांनी त्यांच्यावर अचानक झडप घालत एकाने तोंड दाबले तर, दुसर्‍याने अंगावरील दागिने ओरबडून काढले, गळ्यातील पोत, गळ्यातील टॉप्स आणि पायातील जोडवे असा ऐवज घेवून दोघा भामट्यांनी सुनीता सोनार यांचे तोंड व हातपाय बांधुन तेथून पळ काढला.

उपअधीक्षकांसह कर्मचार्‍यांची घटनास्थळी भेट
दिवस उजाडल्यावर सोनार कुटूंबीय झोपेतून उठल्यावर त्यांनी सुनीता यांचा शोध घेतल्यावर त्या, कंपाऊंड मध्ये हातपाय बांधलेल्या अवस्थेत पडलेल्या होत्या. घटनेची माहिती तत्काळ जिल्हापेठ पोलिसांना कळवल्यावर सहाय्यक पोलिस अधीक्षक डॉ.निलाभ रोहन, प्रभारी अधिकारी संदिप अराक आणि डीबी पथकाने घटनास्थळावर धाव घेत पहाणी केली. भेदरलेल्या सुनीता सोनार यांचा पोलिसांनी जबाब नोंदवुन घेतला असून या प्रकरणी उशिरा पर्यंत गुन्हा दाखल करण्याचे काम सुरु होते