अंजली दमानियांसह प्रीती मेमन यांना दिलासा नाहीच

माजी मंत्री खडसे बदनामी प्रकरण ; गैरहजेरीचे अर्ज रद्द

मुक्ताईनगर- माजी महसूलमंत्री एकनाथरावजी खडसे यांची बदनामी केल्याप्रकरणी अंजली दमानिया व प्रीती मेमन यांनी न्यायालयात कायमस्वरूपी गैरहजर राहण्यासाठी अर्ज केला होता. याबाबत मंगळवार, 5 रोजी मुक्ताईनगर न्यायालयाने हे अर्ज रद्द केले आहेत. खडसे यांच्यासह भारतीय जनता पक्षाची बदनामी केल्याप्रकरणी अंजली दमानिया व प्रीती शर्मा मेनन यांच्याविरोधात भाजपा कार्यकर्ते रमेश ढोले यांनी मुक्ताईनगर न्यायालयात फौजदारी खटला दाखल केला आहे तर राज्यभरात 27 न्यायालयांमध्ये या प्रकरणी खटले दाखल आहेत.

गैरहजेरीचा अर्ज केला रद्द
मुक्ताईनगर न्यायालयातील कामकाजादरम्यान कायमस्वरूपी गैरहजर राहू देण्यासाठी अंजली दमानियांतर्फे निशाणी 45 व प्रीती शर्मा यांच्यातर्फे निशाणी 19 अर्ज दाखल करण्यात आला होता. या निशाणी अर्जांबाबत मंगळवारी मुक्ताईनगर न्यायालयात दोन्ही पक्षांतर्फे युक्तीवाद करण्यात आला. दोन्ही पक्षांची बाजु ऐकुन न्या.आर.एस.मानकर यांनी दमानिया यांचा निशाणी 45 अर्ज व प्रीती शर्मा यांचा निशाणी 19 अज रद्द केले तर पुढील सुनावणी आता 26 फेब्रुवारी रोजी होणार आहे. फिर्यादी रमेश ढोले यांच्या बाजुने अ‍ॅड.व्ही.एच.पाटिल (जळगाव) व सहयोगी वकील म्हणून अ‍ॅड.ए.आर.कांडेलकर (मुक्ताईनगर), अ‍ॅड.बाळाभाऊ पाटिल यांनी बाजु मांडली तर अंजली दमानिया व प्रीती शर्मा यांच्या बाजुने अ‍ॅड.सुधीर कुलकर्णी यांनी बाजू मांडली.