अंजली दमानिया यांना रावेर न्यायालयाचा दिलासा

अटक वॉरंट माघारी ; उपस्थित राहू न शकल्यामागचे परिस्थितीजन्य पुरावे सादर

रावेर– बदनामी खटल्याप्रकरणी रावेर न्यायालयाने सामाजिक कार्यकर्त्या अंजली दमानिया यांच्याविरुद्ध अटक वॉरंट जारी केली होते मात्र दमानिया न्यायालयात हजर न राहण्यामागचे परिस्थितीजन्य पुरावे सादर करण्यात आल्याने न्यायालयाने अटक वॉरंट मागे घेतले आहेत.

वकीलांनी सादर केले पुरावे
सामाजिक कार्यकर्त्या अंजली दमानिया यांच्यावर मुंबईच्या कोकीळाबेन धीरुभाई अंबानी रुग्णालयात स्तनाच्या कर्करोगाची दोनदा शस्त्रक्रिया करण्यात आली तसेच त्यांच्या सासू हंसा दमानिया यांनाही लिलावती रुग्णालयात दाखल केल्याने त्या रावेर न्यायालयात सुनावणीसाठी उपस्थित न राहू शकल्याचे परिस्थितीजन्य दस्तावेज सादर करण्यात आले. दमानिया यांचे वकील अ‍ॅड.सुधीर कुलकर्णी व अ‍ॅड.दिलीप बोरसे यांनी दाखल केलेल्या अर्जावरून शुक्रवारी रावेर न्यायालयाने अटक वॉरंटचे जारी केलेले आदेश माघारी घेतले.

बदनामी प्रकरणी दाखल होता खटला
भारतीय जनता पार्टीचे नेते व माजी महसूलमंत्री एकनाथराव खडसे यांच्यावर जावयाची लिमोझीन कार, भोसरी भूखंड प्रकरण, अपसंपदा गोळा करणे, कार्यकर्त्याचे लाच प्रकरण आदी विषयांवर खोटे आरोप करून बदनामी केल्याप्रकरणी दमानिया यांच्या विरूद्ध भाजपा तालुकाध्यक्ष सुनील पाटील यांनी रावेर न्यायालयात बदनामीचा फौजदारी खटला दाखल केला आहे. दमानिया या सातत्याने न्यायालयात गैरहजर राहिल्याने न्या.दिलीप मालवीय यांनी गुरुवारी सांताक्रुझ पोलीस स्टेशनला त्यांना तातडीने अटक वॉरंटचे बजावले होते.