अकलूद शिवारात परमिटरूम व बिअरबारचे हॉटेल फोडले : चार लाखांचा मुद्देमाल चोरीला

फैजपूर : अकलूद शिवारातील परमिटरूम व बिअरबारचे हॉटेल फोडून चोरट्यांनी देशी, विदेशी दारूचे बॉक्ससह अन्य साहित्य मिळून तीन लाख 90 हजार रुपये किंमतीचा मुद्देमाल चोरून नेला. फैजपूर पोलिस ठाण्यात या प्रकरणी गुन्हा दाखल करण्यात आला.

महागड्या दारूसह साहित्य लंपास
नितीन प्रल्हाद पवार (40, नालंदा नगर, भुसावळ) हे आपल्या कुटुंबियांसह वास्तव्यास असून त्यांचे यावल तालुक्यातील दुसखेडा रोडवरील अकलूद शिवारात आनंद परमिटरूम व बिअर बार नावाचे हॉटेल आहे. मंगळवार, 5 जूलै रोजी नेहमीप्रमाणे त्यांनी हॉटेल बंद करून घर गाठले मात्र मध्यरात्री अज्ञात चोरट्यांनी हॉटेलचे शटर तोडून आत प्रवेश करत दुकानातील महागड्या देशी व विदेशी दारूसह बिअरच्या बाटल्या, सीसीटीव्ही डिव्हीआर, मॉनीटर, इन्व्हर्टर, बॅटरी, इंटरनेट राऊटर, मिक्सर, भांडी, इलेक्ट्रीक सामान मिळून तीन लाख 90 हजार 930 रुपये किंमतीचा मुद्देमाल चोरून नेला व बुधवारी सकाळी चोरी झाल्याचे लक्षात आले. बुधवारी सायंकाळी फैजपूर पोलिसात अज्ञात चोरट्यांविरोधात गुन्हा दाखल करण्यात आला. पुढील तपास पोलिस उपनिरीक्षक मोहन लोखंडे करीत आहे.