अखेर उदयनराजेंच्या मनासारखे झाले; पोटनिवडणूक जाहीर !

सातारा: राष्ट्रवादीला सोडचिठ्ठी देऊन भाजपवासी झालेले साताऱ्याचे माजी खासदार उदयनराजे भोसले यांची इच्छा पूर्ण झाली आहे. भाजपात प्रवेश घेताना त्यांनी विधानसभेबरोबरच लोकसभेची पोटनिवडणूक घ्यावी अशी मागणी केली होती. अखेर आज मंगळवारी निवडणूक आयोगाने सातारा लोकसभेची पोटनिवडणूक जाहीर केली आहे, त्यामुळे विधानसभेसोबत म्हणजेच २१ ऑक्टोबरलाच साताऱ्यात मतदान होणार आहे.

केंद्रीय निवडणूक आयोगाने महाराष्ट्र आणि हरयाणा विधानसभा निवडणुकीची घोषणा करताना साताऱ्याचा कोणताही उल्लेख केला नव्हता. त्यामुळे साताऱ्याची विधानसभा निवडणूक लांबणीवर पडण्याची शक्यता व्यक्त केली जात होती. दरम्यान, केंद्रीय निवडणूक आयोगाने मंगळवारी सातारा लोकसभा पोटनिवडणुकीचा कार्यक्रम जाहीर केला. राज्याच्या विधानसभेसोबत २१ ऑक्टोबरला सातारा लोकसभा निवडणुकीसाठी मतदान होणार आहे. तर मतमोजणी २४ ऑक्टोबरला विधानसभा मतमोजणीच्या दिवशीच होणार आहे.

सातारा लोकसभा निवडणुकीसंदर्भात मुंबई उच्च न्यायालयात याचिका दाखल असल्यामुळे पोटनिवडणुकीचा निर्णय स्थगित करण्यात आला होता. या याचिकेवर न्यायालयाने निकाल दिल्यानंतर सातारा पोटनिवडणुकीचा निर्णय घेण्यात आला आहे. न्यायालयाचे आदेश सोमवारी केंद्रीय निवडणूक आयोगाला मिळाले. त्यानंतर मंगळवारी सातारा लोकसभा पोटनिवडणुकीची आयोगाने घोषणा केली.