अखेर उमरोली ग्रामपंचायतीचे डम्पिंग बंद

कर्जत : उमरोली ग्रामपंचायत हद्दीतील गावांमधील कचरा हा वावे गावच्या रहदारीच्या रस्त्यावर असलेल्या डम्पिंग ग्राउंडमध्ये टाकण्यात येत होता. त्यामुळे परिसरात मोठ्या प्रमाणात दुर्गंधी पसरून वावे ग्रामस्थांचे आरोग्य धोक्यात आले होते. वावे ग्रामस्थांनी हे डम्पिंग ग्राउंड बंद करण्यासाठी जिल्हा परिषद आणि कर्जत पंचायत समितीकडे तक्रार केली होती. यासंदर्भात वरिष्ठ कार्यालयाने हे डम्पिंग ग्राउंड बंद करण्याचे आदेश दिल्याने येथील डम्पिंग ग्राउंड शुक्रवारी सायंकाळी बंद करण्यात आले. उमरोली ग्रामपंचायत हद्दीतील अनेक गावांमधील कचरा आणि स्थानिक खासगी रुग्णालयातील जैविक कचरा या डम्पिंग ग्राउंडमध्ये टाकण्यात येत होता. त्यामुळे परिसरात मोठ्या प्रमाणात दुर्गंधी पसरली होती आणि त्यामुळे ग्रामस्थांच्या आरोग्याचा प्रश्न गंभीर बनला होता.

ग्रामस्थांमध्ये समाधानाचे वातावरण
पावसाळ्यात हा कचरा नदीत तर परिसरात पसरत होता. त्यामुळे या डम्पिंग ग्राउंडला ग्रामस्थांनी विरोध केला होता. त्यानुसार रायगड जिल्हा परिषदेचे अतिरिक्त आरोग्य अधिकारी आणि तालुका वैद्यकीय अधिकारी यांनी सदर जागेची पाहणी केली होती. ग्रामपंचायत ही स्थानिकांच्या आरोग्याबाबत कोणतीही काळजी घेत नसल्याचे यावरून दिसून आले होते. त्यामुळे जिल्हा परिषद आणि पंचायत समिती कर्जत यांनी हे डम्पिंग ग्राउंड दुसरीकडे हलवून हे डम्पिंग ग्राउंग बंद करण्याचे आदेश उमरोली ग्रामपंचायतीला दिले होते तसेच हा डम्पिंग ग्राउंड बंद करण्यासाठी माजी जिल्हा परिषद अध्यक्ष नीलिमा पाटील, विद्यमान जिल्हा परिषद सदस्य सुदाम पेमारे, नारायण डामसे यांनीही पुढाकार घेतला होता. त्यानुसार शुक्रवारी 14 जुलै रोजी वावे गावाजवळ असलेले डम्पिंग ग्राउंड ग्रामपंचायतीने बंद केले आहे. त्यामुळे वावे ग्रामस्थांनी समाधान व्यक्त केले आहे.

उमरोली ग्रामपंचायत जमा झालेला कचरा वावे ग्रामस्थांच्या रहदारीच्या ठिकाणी टाकत असल्याने येथे मोठ्या प्रमाणात दुर्गंधी पसरली होती. त्यामुळे नागरिकांचे आरोग्य धोक्यात आले होते. ग्रामस्थांनी या डम्पिंग ग्राउंडला विरोध करून हा डम्पिंग ग्राउंड बंद करण्यात यावा, अशी मागणी जिल्हा परिषद, पंचायत कर्जत यांच्याकडे केली होती. त्यानुसार शुक्रवारी हे डम्पिंग ग्राउंड बंद करण्यात आले आहे.
रामदास शेलार
ग्रामस्थ वावे

या डम्पिंग ग्राउंडसंदर्भात ग्रामस्थांनी तक्रारी केल्या होत्या. त्यानुसार जिल्हा आरोग्य अधिकारी आणि पंचायत समिती कर्जत यांनी हे डम्पिंग ग्राउंड बंद करण्याचे आदेश दिले होते. त्यानुसार हे डम्पिंग ग्राउंड शुक्रवारी सायंकाळी बंद करण्यात आले आहे.
पी. जी. गाडेकर
ग्रामविकास अधिकारी, उमरोली ग्रामपंचायत