अखेर ठरले राणा जगजितसिंह शनिवारी करणार भाजपात प्रवेश !

उस्मानाबाद: गेल्या काही दिवसांपासून राष्ट्रवादी काँग्रेसचे आमदार राणा जगजितसिंह पाटील हे भाजपात प्रवेश करणार असल्याची चर्चा होती. अखेर राणा जगजितसिंह पाटील हे भाजपात प्रवेश करणार असल्याची निश्चित झाले आहे. खुद्द राणा जगजितसिंह यांनी आपण शनिवारी भाजपमध्ये प्रवेश करणार असल्याचा निर्णय जाहीर केला. आपण काळजावर दगड ठेवून हा निर्णय घेत असल्याचे त्यांनी म्हटले. यावेळी कार्यकर्त्यांसमोर राणा जगजितसिंह पाटील अश्रू अनावर झाले.

जिल्ह्याच्या विकासासाठी आपण पक्ष बदल करतो आहे. शरद पवार हे दैवत होते, आहे आणि राहतील. अतिशय जड अंत:करणाने आपण हा निर्णय घेतल्याचे राणा पाटील म्हणाले. त्यानंतर राणा पाटील हे भावुक झाले. पद्मसिंह पाटील गेल्या ४५ वर्षांपासून राष्ट्रवादी काँग्रेसचे अध्यक्ष शरद पवार यांचे अत्यंत जवळचे सहकारी आणि विश्वासू मानले जात होते. मात्र त्यांनीही आज इतरांप्रमाणे भाजपाची वाट धरली आहे. उस्मानाबादचे राष्ट्रवादीचे आमदार राणा जगजितसिंह यांच्या भाजपा प्रवेशावर शिवसेना नेते आणि जलसंधारणमंत्री तानाजी सावंत यांनी आक्षेप घेतला आहे. गाढवाने जरी वाघाचं घोंगडं घालून वाघाच्या कळपात शिरण्याचा प्रयत्न केला तरी ही जनता तुमच्यावर गाढव असल्याचं शिक्कामोर्तब विधानसभा निवडणुकीत केल्याशिवाय राहणार नाही, असा टोला सावंत यांनी लगावला आहे.