अनधिकृत मोबाईल टॉवरला ठोकले ‘सील’

हडपसर । वन विभागाच्या महंमदवाडी येथील जागेवर अतिक्रमण करून उभारण्यात आलेल्या अनधिकृत मोबाईल टॉवरला वनविभागाने ‘सील’ ठोकले आहे. येथील दिल्ली पब्लिक स्कूलच्या समोर वन विभागाची जागा आहे. या जागेवर टोलेजंग मोबाईल टॉवर उभारण्यात आले आहे. या टॉवरसाठी कोणत्याही प्रकारची परवानगी वन विभागाच्या वतीने देण्यात आलेली नाही. तसेच त्याबाबतची माहितीही वन विभागाला संबंधितांनी दिलेली नाही. याबाबतची पुढील कार्यवाही सुरू असल्याची माहिती वन अधिकार्‍यांनी दिली आहे. दरम्यानच्या काळात ही जमीन वन विभागाची नसून स्वतःची असल्याचा दावा या ठिकाणी असलेल्या एका स्थानिक व्यक्तीने केलेला आहे. त्यामुळे दर महिन्याला लाखो रुपयांचे भाडेही तो घेतो. या व्यक्तीचे म्हणणे असले तरी ही जागा वन विभागाचीच असल्याची माहिती वन अधिकार्‍यांनी दिली आहे.

गेल्याच महिन्यामध्ये पाचगाव पर्वती येथील तळजाई टेकडीजवळ असलेल्या वन विभागाच्या जागेवरील अतिक्रमण सिंहगड रोड पोलिस ठाण्याच्या पोलिस अधिकार्‍यांच्या बंदोबस्तामध्ये हे अतिक्रमण काढण्यात आले. सिंहगड रोड परिसरातील हिंगणे खुर्द येथील प्रभाग क्र. 34मध्ये 25 ते 30 नागरिकांच्या कच्च्या व पक्क्या घरांवर कारवाई करण्यात आली.

वन विभागाचे उपवनसंरक्षक रंगनाथ नाईकडे म्हणाले, मंहमदवाडी येथे असलेल्या वन विभागाच्या जागेवर टोलेजंग मोबाईल टॉवर उभारण्यात आलेले आहे. वास्तविक पाहता हे टॉवर पाडल्यास तेथील स्थानिक नागरिकांचे मोठे नुकसान होण्याची शक्यता आहे. त्यामुळे सध्या हे मोबाईल टॉवर ‘सील’ करण्यात आले. ही जागा वन विभागाचीच असून त्याच्या पुढील कार्यवाहीबाबत हालचाली सुरू असल्याचेही त्यांनी सांगितले.