अनधिकृत हॉटेल्सवर कारवाई न झाल्यास न्यायालयात जावू!

ग्राहक हक्क संघर्ष समितीचा इशारा

पिंपरी : मुंबईतील कमला मिल्स कम्पाउंण्डमध्ये लागलेल्या आगीत 14 नागरिकांचा नाहक जीव गेला. त्या पार्श्‍वभूमीवर पिंपरी-चिंचवड शहरातील अनधिकृत हॉटेल्सवर कारवाई करण्याची मागणी गेल्या पाच महिन्यांपासून करण्यात येत आहे. परंतु, पालिकेतील अधिकारी त्याकडे जाणीवपूर्वक दुर्लक्ष करत असल्याचा आरोप करत महापालिकेने येत्या 15 दिवसांत अनधिकृत हॉटेलवर कारवाई केली नाही तर ग्राहक हक्क संघर्ष समिती पिंपरी महापालिकेविरोधात न्यायालयात धाव घेणार आहे, अशी माहिती ग्राहक हक्क संघर्ष समितीची पिंपरी-चिंचवड शहर अध्यक्ष अनिल उबाळे यांनी प्रसिद्धीपत्रकाद्वारे दिली आहे.

अग्निशामक परवाना घेणे बंधनकारक
हॉटेल व्यवसाय करण्यासाठी महापालिकेचा अग्निशामक परवाना घेणे बंधनकारक आहे. तसेच, अनधिकृत बांधकाम व अतिक्रमण करून व्यवसाय करता येत नाही. तरी देखील शहरामध्ये मोठ्या संख्येने अनधिकृत हॉटेल व्यवसाय तेजीत सुरू आहे. काही नामांकित हॉटेल्समध्ये रूफ टॉप टेरेस हॉटेल रेस्टोरंट, हुक्का बार पार्लर, पब अनधिकृतपणे सुरु आहे. यासाठी काही हॉटेल मालकांनी अतिरिक्त व असुरक्षित काम केले आहे. तसेच पार्कीगमध्ये काही व्यावसायिकांनी बिनदिक्कतपणे हॉटेल व्यवसाय सुरू केला आहे. त्याचबरोबर पदपथ व रस्त्यावर अतिक्रमण करूनही अनेक ठिकाणी हॉटेल्स थाटले गेले आहेत. त्यामुळे हॉटेल्सचा लाभ घेणार्‍या नागरिकांच्या सुरक्षेचा प्रश्‍न ऐरणीवर आला आहे. सध्या शहरात सुमारे 16 अनधिकृत हॉटेल्स सुरु आहेत. त्यातील केवळ एका हॉटेलवर महापालिकेने कारवाई केली आहे. त्यामुळे येत्या 15 दिवसात सर्व बेकादेशीर हॉटेल्सवर कारवाई करावी. अन्यथा जून 2018 च्या पहिल्या आठवड्यात महापालिकेविरोधात समिती न्यायालयात धाव घेणार आहे.