अन् पथकाला तुरी देत चालक ट्रॅक्टर घेवून पसार
जळगाव । नाझगिरी ते मोहाडी रस्त्यावर गिरणानदीपात्रातून अवैधपणे वाळू वाहतूक करणारे शुक्रवारी सकाळी 9 वाजता तलाठ्यासह महसूलच्या पथकाने पकडले. वाळू वाहतुकीचा परवाना मागितला असता ट्रॅक्टर चालक व मालकाने कर्मचार्यांशी अरेरावी करत काही अंतरावर वाळू फेकून देत ट्रॅक्टर घेवून पसार झाल्याची घटना समोर आली आहे. दरम्यान, याप्रकरणी याप्रकरणी भूषण सुधाकर चव्हाण (रा.धानोरा.ता.जळगाव) याच्याविरोधात एमआयडीसी पोलिसात गुन्हा दाखल करण्यात आला आहे.
चालकाची पथकातील अधिकार्यांशी अरेरावी
सापळा रचल्यानंतर पथकाने सकाळी 9 वाजता नागझिरीकडून मोहाडी गावाकडे येत असलेल्या एका विना नंबरच्या ट्रॅक्टरला अडविले. चालकास नाव विचारुन वाळू वाहतुकीचा परवान्याबाबत विचारपुस केली. चालकाने भुषण सुधाकर चव्हाण असे सांगत तलाठी अहिरे यांच्याशी अरेरावी केली. अहिरे यांनी त्याला पोलीस ठाण्यात ट्रॅक्टर घेण्यास सांगितले परंतू चालकाने मोहाडीपर्यंत पथकाच्या सोबत राहिल्यानंतर पथकाला तुरी देत चालक ट्रॅक्टर घेवून पसार झाला.
पथकाने त्याचा पाठलाग केला असता मोहाडीजवळ ट्रॅक्टरमधील एक ब्रॉस वाळू रस्त्यावर टाकून पसार झाला. यादरम्यान त्याने मोहाडी गावाजवळ पोहचण्याआधीच संपर्क साधून काही माणसे जमविली होती. सुरक्षेच्या कारणास्तव कर्मचार्यांनी घटनास्थळावरुन थेट एमआयडीसी पोलीस ठाणे गाठले व फर्यिाद दिली. याप्रकरणी एमआयडीसी पोलीस ठाण्यात ट्रॅक्टर चालक व मालक भूषण चव्हाण विरोधात वाळू चोरीसह शासकीय कामात अडथळा असा गुन्हा दाखल करण्यात आला आहे़
सापळा रचून पकडले
नाझगिरी येथील गिरणानदीपात्रातून ट्रॅक्टर, डंपरव्दारे अवैधरित्या वाळूची चोरटी वाहतूक केली जात असल्याची माहिती तलाठी राहूल पिंतांबर अहिरे यांना मिळाली होती. त्यानुसार तलाठी अहिरे यांच्यासह फिरत्या पथकातील म्हसावद भाग जगदीश गुरव, तलाठी सचिन माळी, रमेश वंजारी, मनोज सोनवणे यांनी शुक्रवारी सकाळी मोहाडी-नागझिरी रोडवर सापळा रचला.