अपघातात 10 आशा सेविका जखमी

जळगाव । भुसावळ येथील गोजोरे येथे अ‍ॅपे रिक्षा व चारचाकी वाहनाची धडक होवून 10 आशासेविका जखमी झाल्याची घटना शनिवारी सकाळी 10.30 वाजेच्या सुमारास घडली. यावेळी जमखी आशा सेविकांना जिल्हा सामान्य रुग्णालयात उपचारासाठी दाखल केले आहे. या अपघातात रिक्षाचे मोठ्या प्रमाणात नुकसान झाले आहे. आशा सेविका त्यांच्या प्रशिक्षणासाठी अ‍ॅपे रिक्षाने गोजोरे मार्गे किन्ही येथे जात असतांना सकाळी 10 ते 10.30 वाजेच्या सुमारास गोजेरे येथे मलकापूर येथील पंडितराव देशमूख यांच्या कारने त्यांच्या अ‍ॅपे रिक्षाला धडक दिली.

कारच्या चाकातून अचानक हवा निघाल्याने घडली घटना

या धडकेत रिक्षातील वराडसीम येथील मंगला कैलास सपकाळे, जयश्री भोगे, मनिषा राणे, शैला धनगर तसेच जिजाबाई ठाकरे (जोखलखेडा), ज्योती अमृत पाटील (सुनसागव),प्रतिभा पाटील (गोंभी), रेखा कोळी व कविता डोळे दोन्ही रा.गोजोरे यांना दुखापत झाली. यात मनिषा सपकाळे, जयश्री भोगे, मनिषा राणे, जिजाबाई ठाकरे यांना गंभीर दुखापत झाली असून अन्य महिलांना जोरदार मुक्कामार लागला आहे. रिक्षा चालक खलील याला देखील दुखापत झाली. दराम्यान, आशा सेविकांना उपचारासाठी शासकिय रुग्णवाहिकेव्दारे जिल्हा सामान्य रुग्णालयात दाखल करण्यात आले. कार चालक मलकापूर येथिल पंडितराव देशमूख यांच्या गुढग्याला व कमरेला दुखापत झाली असून त्यांना देखील जिल्हा रुग्णालयात आणले होते. त्यांच्याशी झालेल्या संवादानुसार त्यांच्या गाडीच्या एका चाकातील हवा अचानक निघून गेल्याने धक्के जाणवले व लागलीच डिस्कब्रेक दाबले आणि अपघात घडला. मी गाडीत अडकून होतो. लोकांनीच मला बाहेर काढले, असे त्यांनी सांगितले. घटनेचे वृत्त कळताच आशा सेविकांच्या तालुका प्रमुख पांढरे यांनी जिल्हा रुग्णालय गाठून महिलांची विचारपूस केली.