अपसंपदा जमविणार्‍या सेवानिवृत्त भांडारपालासह पत्नी, मुलाविरूध्द गुन्हा

जळगाव। भ्रष्टाचाराची तक्रार आल्यानंतर लाचलुचपथ विभागातर्फे गिरणा पाटबंधारे विभागाचे सेवानिवृत्त भांडारपाल यांची चौकशी सुरु होती. यामध्ये सेवाकाळात त्यांनी 20 लाख 27 हजार 166 रुपयांची अपसंपदा जमविल्याचे उघड झाले. त्यामूळे त्यांच्यासह त्यांना सहाय्य करणारे पत्नी व मुलाविरुध्द रामानंदनगर पोलीसांत गुन्हा दाखल करण्यात आल्याने गिरणा पाटबंधारे विभागाची लाचखोरी पुन्हा चव्हाट्यावर आली आहे.

लाचलुचपत विभागाकडून सुरू होती चौकशी
गिरणा पाटबंधोर विभाग येथे भांडारपाल या पदावर भगवान पुंजाजी बोदडे ( रा.वाघनगर) कार्यरत होते. सन 2015 मध्ये ते सेवानिवृत्त झाले. सेवानिवृत्त भांडारपाल यांची नाशिक परिक्षेत्राचे ऍन्टी करप्शन ब्युरोचे पोलीस अधिक्षक यांच्या आदेशान्वये उघड चौकशी सुरु होती. जळगाव लाचलुचपथ विभागाचे पोलीस उप अधिक्षक पराग सोनवणे यांच्या मार्गदर्शनाखाली ही चौकशी सुरु होती. या चौकशीमध्ये 7 मार्च 1980 ते दि.31 डिसेंबर 2008 दरम्यान वेळोवेळी त्यांच्यासह कुटूंबियांच्या नावे त्यांनी अपसंपदा संपादीत केल्याचे चौकशीत निष्पन्न झाले. यामध्ये 20 लाख 27 हजार 166 रुपयांची मालमत्ता त्यांनी जमविली. यासाठी त्यांची पत्नी अलका बोदडे व मुलगा दिलीप बोदडे यांनी अपसंपदा संपादीत करण्यासाठी भगवान बोदडे यांना साहाय्य केल्याचेही समोर आले आहे. त्यामूळे सेवानिवृत्त भांडारपाल भगवान बोदडे यांच्या विरुध्द लाचलुचपत प्रतिबंध कायदा कलम 13 (1) (ई) सह 13 (2) प्रमाणे व त्यांची पत्नी अलका व मुलगा दिलीप यांच्या विरुध्द भादंवि कलम 109 प्रमाणे गुन्हा दाखल करण्याची परवानगी जळगाव लाचलुचपत कार्यालयाने नाशिक पोलीस उपआयुक्त यांच्याकडे मागितली.

यांच्याविरूध्द तक्रार
पोलीस उपआयुक्त यांच्या परवानगी आज रामानंदनगर पोलीस ठाण्यामध्ये पोलीस उपअधिक्षक पराग सोनवणे यांच्या फिर्यादीवरुन भगवान बोदडे, अलका बोदडे, दिलीप बोदडे यांच्याविरुध्द तक्रार देण्यात आली. त्यांच्या तक्रारीवरुन भाग 6 गुरनं 3024/2017 लाचलुचपत प्रतिबंधक कायदा कलम (13) (1) (ई) सह 13 (2) प्रमाणे व भादंवि कलम 109 प्रमाणे गुन्हा दाखल करण्यात आला आहे.