अपहरण करून जबरदस्तीने लावले लग्न

पुणे – तरुणीचे अपहरण करून जबरदस्तीने तिचा विवाह लावण्यात आल्याची धक्कादायक घटना समोर आली आहे. या प्रकरणी ४ जणांवर एमआयडीसी भोसरी पोलीस ठाण्यात अपहरणाचा गुन्हा दाखल झाला आहे. तसेच पतीवर बलात्काराचाही गुन्हा नोंदवण्यात आला आहे. मोशी येथे राहणाऱ्या तरुणीने अपहरण करुन जबरदस्तीने विवाह लावून दिल्याची फिर्याद पोलिसात दिली.

भोसरी पोलीसात तक्रार
१३ एप्रिल २०१८ रोजी दुपारी १२ वाजताच्या सुमारास चिमणाजी चौधरी, नथाराम जसाराम चौधरी (दोघेही रा. नेरूळ, नवी मुंबई), जोगाराम चौधरी (रा. पनवेल) आणि काळुराम चौधरी या चारही आरोपींनी आपसांत संगनमत करून त्या तरुणीचे मोशीतून अपहरण केले. त्यानंतर मुंबईतील वांद्रे परिसरात तिचा जबरदस्तीने आरोपी मोहनलाल चौधरी याच्याशी विवाह लावला. त्यानंतर पीडित तरुणीला जिवे मारण्याची धमकी देत वेगवेगळ्या ठिकाणी नेऊन तिच्यावर बलात्कार करण्यात आला.

एवढेच नाही तर पीडित तरुणीच्या नावे फेसबुक अकाऊंट तयार करून त्यावरून अश्लिल फोटो पाठवून तिची बदनामीही करण्यात आली. पीडितेने दाखल केलेल्या या फिर्यादीनंतर त्या चौघांवर गुन्हा दाखल करण्यात आला आहे. दरम्यानच्या काळात पीडित तरुणीच्या वडिलांनी मुलगी बेपत्ता झाल्याची फिर्याद एमआयडीसी पोलीस ठाण्यात दिली होती. या घटनेचा अधिक तपास सहायक पोलीस निरीक्षक ए. एन. धुमाळ करीत आहेत.