अबू तेरा क्या होगा?
मुंबई : 1993च्या मुंबई बॉम्बस्फोट खटल्यातील दोषी अबू सालेमसह अन्य सहा जणांना विशेष टाडा न्यायालय 7 सप्टेंबररोजी शिक्षा सुनावणार आहे. या खटल्यातील आरोपी मुस्तफा डोसाचा जूनमध्येच तुरुंगात मृत्यू झाला आहे. तर अबू सालेमसह पाच दोषींना न्यायालय शिक्षा सुनावणार आहे.
शिक्षेकडे सर्वांचे लक्ष
मुस्तफा डोसा, अबू सालेम, फिरोज अब्दुल रशिद खान, करिमुल्ला खान ऊर्फ हुसेन हबीब शेख, ताहिर महोम्मद मर्चंट ऊर्फ ताहिर टकल्या, रियाझ सिद्दिकी या सहा जणांना विशेष टाडा न्यायालयाने जून महिन्यात दोषी ठरवले होते. अब्दुल कय्यूम करिम शेख या आरोपीची न्यायालयाने निर्दोष सुटका केली होती. बॉम्बस्फोटांसाठी सालेमने गुजरातमधून मुंबईत शस्त्रसाठा आणला होता. अबू सालेमचे प्रत्यार्पण करताना त्याला फाशीची शिक्षा दिली जाऊ शकत नाही, अशी अट पोर्तुगाल सरकारने घातली होती. त्यामुळे सालेमला 7 सप्टेंबररोजी न्यायालय काय शिक्षा सुनावणार याकडे सर्वांचे लक्ष लागले आहे.
काहींना उशीरा झाली अटक
बॉम्बस्फोटातील आरोपींपैकी काहींना खटल्याच्या पहिल्या टप्प्याचे कामकाज अंतिम टप्प्यात असताना अटक झाली होती. तर काहींना खटल्याचे कामकाज पूर्ण झाल्यानंतर अटक करण्यात आली. त्यामुळे या आरोपींविरोधात पहिल्या टप्प्यातील कामकाजादरम्यान समोर आलेला पुरावा ग्राह्य धरावा की स्वतंत्रपणे यावरून वाद निर्माण झाला होता. अखेर त्यांच्याविरोधात स्वतंत्र खटला चालवण्याचे निश्चित झाले होते.