अभाविपच्या कार्यकर्त्यांवर गुन्हा दाखल

पुणे : उच्चशिक्षण संचालक धनराज माने यांच्या निलंबनासाठी अखिल भारतीय विद्यार्थी परिषदतर्फे करण्यात आलेल्या आंदोलनमध्ये बेकायदेशीर जमाव जमवून शासकीय कामात अडथळा आणल्याप्रकरणी बंडगार्डन पोलीस ठाण्यात रात्री उशिरा गुन्हा दाखल करण्यात आला आहे. याप्रकरणी स्वत: माने यांनी पोलिसांकडे तक्रार दिली आहे. त्यानुसार, 30 ते 35 अज्ञातांवर गुन्हा दाखल करण्यात आला आहे.

औरंगाबाद येथील डॉ. बाबासाहेब आंबेडकर मराठवाडा विद्यापीठातील नोकर भरतीमध्ये चुकीच्या व नियमबाह्य पद्धतीने जागा भरल्या प्रकरणामध्ये संचालक धनराज माने यांचे त्वरित निलंबन करण्याची मागणीसाठी गुरुवारी अभविपीतर्फे माने यांच्या कार्यालयावर आक्रमक आंदोलन केले. भ्रष्टाचारी मानेंना शिक्षणमंत्री विनोद तावडे पाठीशी घातल असून, चोवीस तासामध्ये निलंबन झाले नाही तर तावडेंना पुण्यात पाय ठेवू देणार नाही असा, इशारा अभाविपच्या वतीने देण्यात आला होता. कार्यकर्त्यांनी राज्य सरकार, मुख्यमंत्री व शिक्षणमंत्री यांच्या विरोधात जोरदार घोषणाबाजी केली, यावेळी पोलिसांनी कार्यकर्त्याना ताब्यात घेतले होते.

पारदर्शी कारभाराचे आश्वासन देऊन सत्तेत आलेल्या भाजप सरकारने त्वरीत मानेला निलंबित करावे अन्यथा तीव्र स्वरुपात आंदोलन करण्यात येईल, असा इशारा विद्यार्थी प्रतिनिधी राम सातपुते यांनी दिला. पारदर्शी कारभाराची अपेक्षा करणारे सरकार भ्रष्ट अधिकार्‍याला पाठिशी घालत असल्याचे यानिमित्ताने निदर्शनास येत असल्याचे यातून सिद्ध होते. येत्या 24 तासात निलंबनाच्या निर्णयाची अंमलबजावणी न केल्यास अभाविप तीव्र आंदोलन करेल, असा इशाराही सातपुते यांनी दिला. यावेळी आंदोलकांमध्ये आणि पोलिसांत जोरदार झटापट झाली होती. माने यांच्या कार्यालयात घुसण्याच्या प्रयत्नात असलेल्या आंदोलकांना पोलिसांनी ताब्यात घेतले.

विधानसभेत जरी माझ्या निलंबनाचा ठराव पास झाला असला तरी त्या ठरावाची प्रत अथवा लेखी स्वरुपातील काहीही माझ्यापर्यंत अजून पोहोचले नाही. त्यामुळे मी अजूनही या पदावर कार्यरत आहे.
धनराज माने, शिक्षण संचालक