अभिव्यक्ती स्वातंत्र्यासाठी अंनिस देणार व्यासपीठ!
पुणे । न्यूड, एस दुर्गा, दशक्रिया, पद्मावती आदी चित्रपटांच्या निमित्ताने अभिव्यक्ती स्वातंत्र्याचा मुद्दा ऐरणीवर आला आहे. चित्रपटांमधून सामाजिक परिस्थितीचे वास्तव चित्रण, रूढी-परंपरा आदी विषयांवर भाष्य करण्यात आले आहे. मात्र, या कलाकृतींबाबत आक्षेप घेतला जात आहे. चित्रपटांवर बंदी, आंदोलने यातून अभिव्यक्ती स्वातंत्र्याची गळचेपी केली जात आहे. अशा पद्धतीने दडपशाही करून भारतीय परंपरेचा विचार संपवता येणार नाही. या चित्रपटाच्या निर्माते, दिग्दर्शकाना अंनिस बोलण्यासाठी व्यासपीठ उपलब्ध करून देणार असून, प्रेक्षकांना चित्रपट पाहण्यासाठी प्रोत्साहित केले जाणार असल्याचे महाराष्ट्र अंनिसचे राज्य कार्याध्यक्ष अविनाश पाटील यांनी सांगितले. सरकार झोपले आहे काय? असा संतप्त सवालही त्यांनी केला.
लढा असाच सुरूच राहील
डॉ. दाभोलकर, गोविंद पानसरे, कलबुर्गी, गौरी लंकेश यांची हत्या करणारे आरोपी सापडत नाहीत, हे अत्यंत हास्यास्पद आहे. ही तपास यंत्रणांची विश्‍वासर्हता संपणारी आहे. त्यामुळे सरकारची इच्छाशक्ती, राजकीय नेतृत्व दाखवण्यासाठी मुख्यमंत्र्यांनी महाराष्ट्राच्या जनतेला विश्‍वासात घेऊन याबाबातचे वास्तव आणि जबाबदारी व्यक्त करावी. आज 51 महिने झाले असले तरी आम्ही आमच्या तीव्र भावना आणि सरकारचा निषेध व्यक्त करायला थांबणार नाही, हा लढा असाच सुरूच राहील, असेही पाटील म्हणाले. राजकीय इच्छाशक्ती अभावी डॉ. नरेंद्र दाभोलकर, कॉम्रेड गोविंद पानसरे, ज्येष्ठ साहित्यिक कलबुर्गी, पत्रकार गौरी लंकेश यांचे मारेकरी अद्यापही सापडत नाहीत. मात्र, सनदशीर मार्गाने अंधश्रद्धा निर्मूलन समिती लढा सुरूच ठेवणार आहे, अशी माहिती पाटील यांनी पत्रकार परिषदेत दिली.
संविधान अभिवादन फेरी, संवाद सभा
महाराष्ट्र अंधश्रद्धा निर्मूलन समितीतर्फे संविधान बांधिलकी महोत्सवाचे दशक साजरे केले जाणार आहे. 26 नोव्हेंबर संविधान स्वीकृती दिन ते 26 जानेवारी प्रजासताक दिनादरम्यान विविध प्रबोधनपर कार्यक्रमांचे आयोजन करण्यात आल्याचे पाटील यांनी सांगितले. संविधान बांधिलकी महोत्सवाच्या निमित्ताने ठिकठिकाणी संविधान अभिवादन फेरी, संविधान संवाद सभा, चालता-बोलता संविधान, संविधान संकल्प सहचिंतन आणि संविधान सांस्कृतिक अभिव्यक्ती आदी उपक्रम राबवले जाणार आहेत. या निमित्ताने ’भारतीय संविधानाचे अंतरंग’ ही पुस्तिका समितीतर्फे प्रकाशित केली जाणार आहे.