अमळनेरात शिक्षकाचा संशयास्पद मृत्यू
योगेश्‍वर माध्यमिक विद्यालयातील शिक्षकाचा घातपातची शक्यता
अमळनेर । अमळनेर जय योगेश्‍वर माध्यमिक विद्यालयाचे शिक्षक डी.डी.पाटील यांचा संशयास्पद मृत्यू झाल्याची घटना 4 मार्च रोजी पहाटेच्या सुमारास घडली. दीपक देवराम पाटील हे पहाटे न्यू प्लॉट मधील डॉ.हजारे ऐक्सिडंट हॉस्पिटलच्या बाहेर मृतावस्थेत पडलेले आढळून आल्याने परिसरात एकच खळबळ उडाली आहे. मयताचा मृतदेह पोलिसांनी रात्री त्यांना अमळनेर ग्रामीण रुग्णालयात दाखल केले. असता त्यांच्या डोक्यावर, पाठीवर, पायांवर मार लागलेला होता. प्राथमिक स्वरूपात पोलिसांनी अकस्मात मृत्यूची नोंद केली आहे. पाटील हे रात्री आपल्या मुलीला मोटारसायकल गाडी शिकवत होते. त्यानंतर त्यांनी धोबीला पैसे देऊन सकाळी लग्नाला जायचे असल्याने इस्तरीचे कपडे आणले. त्यानंतर 10 वाजेच्या सुमारास त्यांना कोणाचा तरी त्यांच्या मोबाईलवर फोन आल्याने ते बाहेर गेले. मात्र रात्री उशिरापर्यंत घरी परतलेच नाहीत. त्यांच्या पत्नीने फोन लावला असता बंद आढळून आला. नातेवाईकाच्या सांगण्यानुसार रात्री दीड वाजता दीपक हजारे अक्सिडंट हॉस्पिटलसमोर डॉक्टरांना बोलव माझा अपघात झाला आहे. असे सांगत होता मात्र डॉक्टर नसल्याने शिक्षक पाटील तेथेच पडून राहीले. सुमारे दोन ते अडीच वाजेच्या सुमारास नंदुरबार येथील पोलिस निरीक्षक गिरीश पाटील यांच्या भावजईने त्यांना सांगितले की, माणसाच्या पायाला कुत्रे ओढत आहेत. तेव्हा पोलिस निरीक्षक गिरीश पाटील यांनी पोलिसांना कॉल करून बोलावले. रात्रीच्या गस्तीवरील पोलिसांनी मयत शिक्षक पाटील यांना रुग्णालायत दाखल केले. वैद्यकीय अधिकारी ताडे यांनी शवविच्छेदन केले. पाटील यांचा मृत्यू संशयास्पद असल्याचा प्राथमिक अंदाज वर्तवण्यात आला असून व्हिसेरा राखून ठेवला आहे. त्यांची मोटारसायकल व खिश्यातील पाकीट गायब असून भ्रमणध्वनीच्या सीडीआरवरून प्रकरण उघडकीस येईल, असे पोलीस निरीक्षक विकास वाघ यांनी सांगितले. मात्र शिक्षकाचा घात की अपघात अशी शहरात उलट सुलट चर्चा सुरू आहे