अमळनेर नाट्यगृहात नाटकाच्या प्रयोगास सुरुवात, श्रेयावरुन शाब्दिक वाद

अमळनेर। येथील नगरपालिके तर्फे उभारण्यात आलेले छात्रपती शिवाजी महाराज नाट्यगृह रसिकांच्या सेवेत कधी रुजू होते याची प्रतीक्षा लागून होती. अखेर ती प्रतीक्षा संपुन त्याठिकाणी युगपुरुष नाटकाचा पहिलाच प्रयोग घेण्यात आला. आषाढी एकादशीच्या पूर्वसंध्येला सोमवारी 3 रोजी छत्रपती शिवाजी महाराज नाटयगृहाचा पडदा रात्री 9 वाजता उघडला. पहिलाच प्रयोग ‘युगपुरुष, महात्मांचे महात्मा’ हा झाला. या प्रयोगाला रसिकांचा चांगला प्रतिसाद मिळाला. मात्र या पहिल्याच प्रयोगात शाब्दिक वादाची घंटी वाजल्याने रसिकांनी आश्चर्य व्यक्त केले. अमळनेरकर रसिकांना नाटकांची असलेली आवड, त्यांच्याकडून मिळणारा प्रतिसाद लक्षात घेऊन, येथेही नाट्यगृह उभारणीसाठी प्रयत्न सुरू झाले. शहराच्या मध्यवर्ती भागात नाट्यगृहासाठी जागा मिळाली. हे नाट्यगृह जवळपास 1300 आसनांचे आहे.

श्रेयावरुन शाब्दींक वाद
नाटक सुरू होण्यापूर्वी ज्येष्ठ रंगकर्मी मधुकर तोरडमल यांना श्रद्धांजली अर्पण करण्यात आली. मात्र अहिंसेचे पुजारी महात्मा गांधी यांचे नाटक सुरू होण्यापूर्वी शाब्दिक वाद झाला. नगरसेवक मनोज पाटील भाषण करीत असताना, संदीप घोरपडे उभे राहून म्हणाले की, शहराची दिशाभूल करू नका. ज्यांनी प्रयत्न केले, त्यांचे नाव न घेता इतरांचे घेऊ नका, राजकारण करू नका असे सांगितले. ह्यावरून शाब्धीक चकमक सुरु झाली वाद वाढू नये म्हणून मान्यवर व्यासपीठावरून खाली उतरले. आमदारांनी माईक ताब्यात घेत मी पदभार स्विकारला तेव्हा काम अपुर्ण होते घोरपडे यांनी लक्षात आलून दिल्याने मी पाच कोटींचा निधी आणला असल्याचे सांगितले.

आमदारांच्याहस्ते उद्घाटन
नाटक सुरू होण्यापूर्वी स्थानिक कलाकार अभिजित मगरे, भाग्यश्री पाटील, प्रकाश पाटील यांनी ‘जय जय महाराष्ट्र माझा’ हे गीत सादर केले. राष्ट्रगीताने कार्यक्रमाची सुरुवात झाली. या वेळी आमदार शिरीष चौधरी यांच्या हस्ते नाटयप्रयोगाचे उद्घाटन झाले. या वेळी नगराध्यक्षा पुष्पलता पाटील, माजी आमदार साहेबराव पाटील, बांधकाम सभापती मनोज पाटील, मोरया नाट्य संस्थेचे अध्यक्ष संदीप घोरपडे, चेतन सोनार, राजेश पाटील, महेंद्र पाटील, महेश पाटील, चेतन शहा, कॉँग्रेसचे तालुकाध्यक्ष गोकूळ पाटील यांच्यासह अनेक जण उपस्थित होते.

मोठे नाट्यगृह
जळगाव, धुळे येथील नाट्यगृहापेक्षाही हे नाट्यगृह मोठे आहे. हे नाट्यगृह वातानुकूलित आहे. नाट्यगृहाच्या उभारणीसाठी अनेकांचा हातभार लागला आहे. बर्‍याच कालावधीनंतर नाट्यगृहाचे काम पूर्ण झाले. नाट्यगृह पूर्ण झाले, मात्र नाटकाची पहिली घंटा कधी वाजणार याची रसिकांना प्रतीक्षा लागून होती. अखेर आषाढी एकादशीच्या पूर्वसंध्येलानाट्यगृहाचा ‘पडदा’ उघडला. पहिलाच प्रयोग रामचंद्र मिशन धरमपूर प्रस्तुत ‘युगपुरुष, महात्मांचे महात्मा’ याचा झाला.