अमेरिका करोना संसर्गाचे नवे केंद्र

वॉशिंग्टन: जागतिक महासत्ता असणारी अमेरिका करोनाचा संसर्गाचे नवे केंद्र झाले असल्याचे समोर आले आहे. जगातील सर्वाधिक करोनाबाधित रुग्ण अमेरिकेत झाले असून चीन, इटलीलाही मागे टाकले आहे. गुरुवारी एकाच दिवसात अमेरिकेत १७ हजार करोनाबाधित रुग्ण आढळले. अमेरिकेत आतापर्यंत ८३ हजार ५०० करोनाबाधित आढळले आहेत. तर, चीनमध्ये ८१ हजार ७८२ आणि इटलीत ८० हजार ५८९ इतके करोनाबाधित रुग्ण आढळले आहेत. अमेरिकेत करोनामुळे १३०० जणांचा मृत्यू झाला आहे. तर चीनमध्ये ३२९२ आणि इटलीत सर्वाधिक ८२१५ जणांचा मृत्यू झाला आहे.
न्यूयॉर्कमध्ये करोनाचा संसर्ग सर्वाधिक झाला आहे. न्यूयॉर्कमध्ये तब्बल ३८ हजार ९७७ जणांना करोनाची बाधा झाली आहे. तर, ४६६ जणांचा मृत्यू झाला आहे. न्यूयॉर्कमधील आरोग्य व्यवस्था कोलमडून पडली असल्याची परिस्थिती निर्माण झाली आहे. आवश्यकतेनुसार रुग्णांवर उपचार करण्यासाठी वैद्यकीय कर्मचारी, रुग्ण खाटा उपलब्ध नाहीत. न्यूयॉर्कचे गर्व्हनर अ‍ॅण्ड्र्यू काओमो यांनी सांगितले की, निवृत्त झालेल्या आरोग्य कर्मचार्‍यांना पुन्हा सेवेत रुजू होण्याचे आदेश देण्यात आले आहेत. त्याशिवाय न्यूयॉर्कमध्ये ३० हजार स्वयंसेवकांची आवश्यकता आहे. मात्र, प्रत्यक्षात ४०० स्वयंसेवक कार्यरत आहेत. एवढे स्वयंसेवक तरी किती काम करतील, अशी खंत त्यांनी व्यक्त केली. न्यूजर्सीमध्ये ६ हजार ८७६, कॅलिफोर्नियात ४ हजार ४४ जणांना करोनाची बाधा झाली आहे.