अमेरिकेची रसद खुंटल्याने पाकची भारतावर आगपाखड

इस्लामाबाद : अमेरिकेने पाकिस्तानची आर्थिक मदत बंद केल्यामुळे पाकिस्तान आणि अमेरिकेमध्ये वाकयुद्ध सुरु झाले आहे. पाकिस्तानने या शाब्दिक लढाईत भारतालाही आता खेचले आहे. भारताने पाकिस्तानविरुद्ध खोटी आणि कपटनितीची खेळी केली. आता अमेरिकेचे अध्यक्ष डोनाल्ड ट्रम्पही तेच आरोप करत आहेत, असे एक्सप्रेस ट्रिब्युन या पाकिस्तानी वर्तमानपत्राने म्हटले आहे.

पाक खोटारडा, दहशतवाद्यांना मदत
दहशतवादाविरुद्ध लढण्यासाठी अमेरिकेने पाकिस्तानला भरभरून मदत केली पण त्याच्या बदल्यात पाकिस्तानकडून अमेरिकेला फक्त खोटारडेपणा आणि फसवणूकच मिळाली, असे सुनावत अमेरिकेचे राष्ट्राध्यक्ष डोनाल्ड ट्रम्प यांनी पाकिस्तानला अमेरिकेकडून दिली जाणारी 255 दशलक्ष डॉलरची वार्षिक मदत बंद करण्याचे संकेत सोमवारी दिले होते. यामुळे पाकची चांगलीच आर्थिक कोंडी झाली आहे. परंतु, याचे खापर पाकने भारतावर फोडण्यास सुरूवात केली आहे. भारत आणि अमेरिकेचे हितसंबंध गुंतलेले असून अमेरिका भारताचीच भाषा बोलत आहे, असा आरोप पाकिस्तानचे परराष्ट्रमंत्री ख्वाजा असिफ यांनी केला आहे.

पाकिस्तान हवालदिल
15 वर्षांत अमेरिकेने पाकिस्तानला 33 अब्ज डॉलरहून अधिक आर्थिक मदत करण्याचा मूर्खपणा आमच्या नेत्यांनी केला, असे पाकला वाटते. आमच्या वाट्याला फक्त खोटारडेपणा आणि फसवणूकच आली. आता बस्स झाले!, असे ट्विट डोनाल्ड ट्रम्प यांनी करून पाकला झापले होते. पाकिस्तान दहशतवाद्यांना आश्रय देते असा आरोप करत ट्रम्प यांनी लिहिले की, शेजारच्या अफगाणिस्तानात अमेरिका ज्या दहशतवाद्यांच्या मागावर आहे त्यांना पकडण्यास मदत करण्याऐवजी पाक त्यांना आश्रय देत आहे. पुर्णपणे अमेरिकेच्या मदतीवर अवलंबून असणार्‍या पाकची आर्थिक रसद बंद होत असल्याने त्यांची झोप उडाली आहे.