अमेरिकेतील भारतीयांच्या सुरक्षेसाठी काय उपाययोजना केल्या!

पिंपरी-चिंचवड : अमेरिकेमध्ये औद्योगिक व्यवसाय व आय.टी. क्षेत्रात काम करणार्‍या भारतीय वंशाच्या कर्मचार्‍यांना संरक्षण देण्यासाठी भारत सरकारकडून कोणते धोरण राबविले जात आहे, असा तारांकित प्रश्न खासदार श्रीरंग बारणे यांनी लोकसभेत नुकताच उपस्थित केला. अमेरिकेचे राष्ट्राध्यक्ष म्हणून डोनाल्ड ट्रम्प यांची नियुक्ती झाल्यापासून वंशाने भारतीय नागरिक असलेल्या व अमेरिकेत व्यवसाय करीत असलेल्या नागरिकांना गेल्या काही दिवसांपासून अनेक अडचणी निर्माण झाल्या असल्याचे सोशल मीडियावर सातत्याने प्रसिद्ध होणार्‍या बातम्यांवरून समजते. याच अनुषंगाने खासदार श्रीरंग बारणे यांनी संसदेमध्ये हा तारांकित प्रश्न विचारला.

भारतीय नागरिकांना अडचणी
खासदार श्रीरंग बारणे म्हणाले, पंतप्रधान नरेंद्र मोदी यांनी जून 2016 मध्ये अमेरिका दौर्‍यादरम्यान तत्कालीन राष्ट्राध्यक्ष बराक ओबामा यांच्यासोबत आण्विक ऊर्जा, संरक्षण आणि सुरक्षा अशा विषयांवर दोन्ही देशामध्ये चांगले संबंध प्रस्थापित केले होते. परंतु अमेरिकेच्या राष्ट्राध्यक्ष पदी डोनाल्ड ट्रम्प यांची नियुक्ती झाल्यानंतर अमेरिकेमध्ये औद्योगिक व्यवसाय करणार्‍या भारतीय नागरिकांच्या व्यवसायावर परिणाम होत असून, मूळच्या भारतीय नागरिकांना आपले व्यवसाय वाचविण्याचे मोठे आव्हान असल्याचे मागील काही दिवसांपासून मीडियाच्या माध्यमातून प्रसिद्ध होत आहे.

वंशद्वेषातून हल्ले
अमेरिकेच्या राष्ट्राध्यक्षपदी डोनाल्ड ट्रम्प यांची नियुक्ती झाल्यापासून काही भारतीयांवर अमेरिकेत वंशद्वेषातून हल्ले करण्यात येत आहेत. त्यामुळे अमेरिकेत वास्तव्यास असलेल्या भारतीय नागरिकांच्या सुरक्षेसाठी व आय.टी. क्षेत्रात काम करणार्‍या नागरिकांसाठी भारत सरकारकडून कोणते धोरण राबविले जात आहे, असा प्रश्न श्रीरंग बारणे यांनी निर्मला सीतारमण यांच्यासमोर लोकसभेत उपस्थित केला.