अयोध्येचा नाद न सोडल्यास भारताचा सीरिया होईल!

श्री श्री रवि शंकर यांनी दिला सूचक इशारा
मंदीर-मशिदीचा वाद आणखी पेटण्याची शक्यता

नवी दिल्ली : जर राम मंदिराचा मुद्दा वेळीच सोडवला नाही तर भारताचा सीरिया होईल, असा सूचक इशारा आर्ट ऑफ लिव्हिंगचे संस्थापक श्री श्री रविशंकर यांनी दिला आहे. रवि शंकर यांचे विधान राम मंदिर – बाबरी मशीद प्रकरणात नवा वाद निर्माण करण्याची शक्यता वर्तवण्यात येत आहे. इंडिया टुडे टीव्हीशी बोलताना रवि शंकर यांनी जर राम मंदिराचा मुद्दा सोडवला नाही तर भारताचा सीरिया झालेला आपल्याला बघायला मिळेल, असे मत व्यक्त केले. सद्या रवि शंकर या प्रकरणाशी संबंधित अनेकांच्या भेटी घेऊन कोर्टाबाहेर सामोपचाराने हे प्रकरण मिटवण्याचा प्रयत्न करत आहेत. सीरियामध्ये सत्तारूढ अध्यक्ष बशर अल असद यांच्या सरकारविरोधात गेली आठ वर्षे बंडखोरांनी युद्ध छेडले असून, प्रचंड प्रमाणात नरसंहार झाला आहे. या यादवीमध्ये 4,65,000 सीरियन मारले गेले आहेत तर 10 लाखांपेक्षा जास्त जखमी झाले व जवळपास सव्वाकोटी सीरियन विस्थापित झाले आहेत.

आम्ही प्रभू रामचंद्रांचे जन्मस्थळ बदलू नाही शकत!
सीरियाचे उदाहरण देताना रवि शंकर यांनी मुस्लिमांनी अयोध्येवरचा दावा सोडावा असा सल्ला दिला आहे. अयोध्या ही जागा ही मुस्लिमांसाठी श्रद्धास्थान नाही, त्यामुळे त्यांनी सद्भावनेतून अयोध्येवरचा दावा सोडावा, असे रवि शंकर म्हणाले आहेत. वादग्रस्त जागेवर प्रार्थना करण्यास इस्लाममध्ये मनाई असल्याचा दाखला त्यांनी दिला. तसेच, प्रभू रामचंद्रांचे जन्मस्थान आम्ही बदलू शकत नाही असेही त्यांनी सांगितले. वादग्रस्त जागेवर हॉस्पिटलसारख्या वास्तू उभारण्यासारख्या सूचनांना रवि शंकर यांनी झिडकारले आहे. प्रभू रामचंद्रांचा जन्म या जागी झाला अशी हिंदूंची श्रद्धा आहे. मुघल काळात या जागी मशीद उभारण्यात आली जी हिंदू जमावाने 6 डिसेंबर 1992 मध्ये जमीनदोस्त केली. तेव्हापासून हा प्रश्न धगधगत आहे, असेही रवि शंकर यांनी सांगितले.

रवि शंकर यांनी घेतल्या 500 नेत्यांच्या भेटी
गेल्या वर्षभरात रवि शंकर देशभरातल्या 500 नेत्यांना भेटले असून, त्यांनी या नेत्यांशी चर्चा केली आहे व हा मुद्दा कोर्टाबाहेर सोडवण्याचा ते प्रयत्न करत आहेत. मध्यंतरी, ऑल इंडिया मुस्लीम पर्सनल लॉ बोर्डाचे निलंबित सदस्य सय्यद सलमान हुसेन नकवी यांनाही रवि शंकर भेटले होते. नकवींनी मशीद दुसरीकडे हलविणे इस्लामविरोधी नसल्याचे विधान केले होते. यामुळे त्यांच्यावर प्रचंड टीकाही झाली होती. रवि शंकर यांनी नकवींना पैसे दिल्याचा आरोपही झाला, जो रवि शंकर यांनी फेटाळला आहे.