अयोध्येत राममंदिरासाठी मुस्लीम कारसेवकाचा पुढाकार

लखनौ । अयोध्येमध्ये राममंदिर बनावे ही मुस्लिमांचीही इच्छा आहे असे पोस्टर लखनौ येथे लावण्यात आले आहेत. भारतीय जनता पक्षाने जाहीरनाम्यात सत्तेमध्ये आल्यावर राम मंदिर बांधले जाईल असे म्हटले होते. मुस्लिमों का यही अरमान, श्रीराम मंदिर का हो वहीं निर्माण असे मुस्लिमांनी पोस्टरवर लिहिले आहे. मुस्लिम कार सेवक मंचाचे अध्यक्ष आजम खान यांनी असे दहा पोस्टर्स लावले आहेत.

गेल्या काही वर्षांपासून हिंदू आणि मुस्लिमांमध्ये समन्वय घडवून अयोध्येमध्ये राम मंदिर बनावे यासाठी प्रयत्न करत आहेत. त्यांच्या या कार्याला दोन्ही धर्मियांकडून चांगला प्रतिसाद मिळत असल्याचे ते म्हणाले. काही लोक धमक्या देखील देत आहे असे त्यांनी म्हटले. श्रीराम हे केवळ हिंदुनांच पूजनीय आहेत असे नाही तर ते मुस्लिमांचेही आदर्श आहेत असे आजम खान म्हणतात.

काही लोकांचे असे म्हणणे आहे की त्या ठिकाणी तुम्ही मशीद बांधण्यासाठी का प्रयत्न करत नाही. त्यांना उत्तर देताना आपली दमछाक होत असल्याचे आजम खान यांनी म्हटले.