अयोध्येनंतर आता चंद्रभागातीरी शिवसेना करणार आरती

मुंबई- अयोध्येत राम मंदिर व्हावे यासाठी शिवसेनेने अयोध्येत शक्तीप्रदर्शन केले होते. आता शिवसेना २४ डिसेंबर रोजी पंढरपुरात जोरदार शक्तिप्रदर्शन करणार आहे. यावेळी शिवसेना पक्षप्रमुख उध्दव ठाकरे हे अयोध्येतील शरयूप्रमाणेच चंद्रभागेच्या तीरावर आरती करणार आहेत. तसेच पंढरपुरात विठुरायाचे दर्शन घेऊन दुष्काळाबाबत सरकारने विविध उपायोजना करावी आणि अयोध्येत राममंदिर बांधण्याची सुबुध्दी सरकारला द्या, असे साकडे घालणार आहेत. यावेळी मुंबई ते पंढरपूर दरम्यान धावणाऱ्या ‘विठाई’ या नव्या एसटी सेवेचा शुभारंभ ठाकरे यांच्या हस्ते होणार आहे.

या सभेसाठी शिवसैनिकांसह राज्यभरातील वारकरी येणार आहेत.अनेक वारकरी संघटनांनी स्वत:हून सभेला उपस्थित राहणार असल्याचे सांगितले आहे.

या सभेच्या तयारीचा आढावा घेण्यासाठी काल शिवसेना भवनात उध्दव ठाकरे यांच्या उपस्थितीत शिवसेना मंत्री आणि प्रमुख पदाधिकाऱ्यांची बैठक झाली. बैठकीत सभेच्या तयारीविषयी चर्चा करण्यात आली.